Imphal, Nohprah:
U Myntri Rangbah ka Jylla Manipur, u N. Biren Singh, u la pynbna ha ka Lah Sngi U Blei ki la don kumba hynñiew ngut ki dkhot jong kawei ka kynhun lehnoh kiba la shah kem na ka bynta ka jingtohkit ha kaba ïadei bad ka jingshah pynïap dang shen jong ar ngut ki nongbylla na Bihar.
Katkum ka jingïathuh jong ki pulit, la ong ba kine ar ngut nongbylla kiba dang samla kiba na Bihar ki la shah siat ïap ha ka miet jong ka Sngi Saitjaiñ ha Kakching distrik.
Ïa kine kiba la shah pynïap la tip kyrteng kum u Dashrat Kumar bad u Sonalal Kumar. Kine baroh ar ngut ki dei kiba dang 18 snem ka rta bad ki dei nongbylla sngi kiba la phah da ki kmie ki kpa jong ki mynshem bnai ban wad kam, namar ba ki lad ki lynti ki duna bha ha ka shnong jong ki ha ka liang ka kam ka jam ha ka distrik Gopalganj jong ka Bihar.
“Ngi la phah ïa u Sonalal sha Manipur da ka jingkyrmen ba un sumar ïa ngi. Ka lad kamai kajih ka duna bha ha ka thaiñ jong ngi,” ong ka Leelawati Devi, ka kmie jong u Sonalal ha ka jingïakren bad ki nongthoh khubor.
Ka la pynpaw ïa ka jingsngewsih bad ka jingsngewbabe halor ka rai jong ka ban phah ïa ki sha ka jylla Manipur kaba don hapdeng ki por jong ki jingïakynad bad ki jingïaumsnam bad ka la khot ïa ka kum ka jingbakla kaba khraw.
Ka longïing kam don jaka rep bad ka shaniah ha ka kamai na ki kam bad ki lad kamai bapher-bapher.
Ha u Naiwieng, u Sonalal, u khun jong u Birendra Mukhiya bad u Dashrat, u khun jong u Mohanlal Ashani, ki la leit sha Manipur ryngkat bad katto katne ngut kiwei pat. Na ka liang u Myntri Rangbah ka Bihar, u Nitish Kumar, u la pynpaw ïa ka jingsngewlem halor kane ka jingjia ba sngewsih bad u la ai ïa ka bailutksan kaba mar T.2 lak sha ki bahaïing bahasem jong kine ki lanot.
Haba kren sha ki nongthoh khubor ha ka jingrakhe ïa ka Vijay Diwas, u Singh u la ong, kumba la ïathuh da ka lad pathai khubor la ong, “Ngi suba jur ïa ka jingdonkti jong ki kynhun ba kyrshan ïa ki seng saiñ pyrthei ha lyndet jong kitei ki jingpynïap briew. La kem ïa hynñiew ngut ki dkhot jong kawei ka kynhun, bad ka jingtohkit ïa ki, ka dang ïaid ban pynthikna la ki donkti ne em ha kane ka kam pynïap briew. Ngin sa lap thikna ïa u nongleh kam sniew,” la ong ki nongpynïaid shnong.
Ha Manipur ki nongbylla ki kamai T. 500 marwei marwei ha ka shisngi. Ha kane ka sngi u la ai burom ruh ïa ki Martir ha ka thma 1971 bad ong,
“Nga ai khublei ïa baroh ki Martir kiba la aiti ïa la ka jong ka jingim na ka bynta ban pynlaitluid ïa ka ri Bangladesh. Bun ki shipai bad ki heh ophisar na Manipur ki la ïashim bynta ha kane ka sngi. Nga phah ïa ka jingkhublei kaba kyrpang tam sha baroh ki bahaïing hasem jong ki martir bad ki nong Bangladesh kiba la pyllaitluid da ki shipai India. Kum ki nong India, ngi sngew sarong halor kane.” Hadien kata, ha ka jingthoh ha ka rynsan X, u Singh u la thoh, “Mynta ka sngi, ha ka jingrakhe ïa ka Vijay Diwas ha 1st MR Banquet Hall, Imphal, nga ai ka burom kaba khraw ïa ki shipai bashlur kiba la aiti lut ha ka thma 1971. Ka jingshlur bad ka jing-aiti jong ki ka la pynthikna ïa ka jingjop ba pawnam jong ka India bad ka jingpyllaitluid ïa ka Bangladesh. Katba ngi dang kynmaw ïa ki jing-aiti jong ki, to ngin pynskhem biang ruh ïa ka jingkular jong ngi ban pynneh ïa ka jingïatylli, ka jinglong ba janai, bad ka jingkiew shaphrang jong ka jaitbynriew jong ngi. Jai Hind.”
