Imphal, Nohprah:
U Myntri ka sorkar pdeng, uba dei khmih ïa ka tnat Road Trasport and Highways, u Nitin Gadkari, u la pynbna ïa ka jingmang pisa kaba T.777.61 klur na ka bynta ban pynheh bad pynbha ïa ka bynta jong ka surok Shangshak-Tengnoupal jong ka National Highway-102A ha Manipur. Ka projek, kaba la mynjur hapoh ka Annual Plan 2024-25, ka thmu ban pynbha ïa ka surok kaba la don lypa kaba don tang kawei ka lynti sha ka surok kaba don ar lynti bad kaba don ka bynta kaba eh.
Kane ka jingjngai kaba 48 km kaba sdang na Khonglo bad kut ha Kasom-Khullen kan long kum ka lynti kaba kongsan ban pynïasoh hapdeng ka Ukhrul bad ka Kamjong jong ka Manipur.
Katkum ka jingong u Gadkari, ka surok ba la pynbha kan ïarap shibun ïa ka jingpynïasoh hapdeng ki ar tylli ki distrik, kan pynbha ïa ka jinglah jong ki surok bad ka jingshakri, bad kan pynduna ïa ka jinglut jingsep ha ka jingpynïaid ïa ki kali na ka bynta ki nongpyndonkam. La khmih lynti ba kane ka projek kan pynkiew ïa ka kam jngohkai pyrthei bad kan ïarap ïa ka jingkiew ha ka imlang-sahlang jong ka thaiñ.
Hynrei ka jingkular jong ka srokar kmie kaba kham hashwa ban pyndep ïa ka jingshna ïa ka surok National Highway-202, ka surok Imphal sha Ukhrul, ka long ha u bnai Jymmang 2024, ka dang sahteng, ha kaba ka projek ka dang sahdien bha na ka por ba la buh.
