New Delhi, Nohprah:
U Myntri ka sorkar pdeng jong ka Aiñ, Arjun Ram Meghwal, u la wanrah ïa ki aiñ pynkylla ïa ka Riti synshar ka ri, na ka bynta ban pynlong ïa ka ilekshon Lok Sabha bad ka ilekshon Assembly ha kajuh ka por ha Lok Sabbha.
Hadien ka jingïakren kaba nyngkong, ka liang pyrshah ka la pan ïa ka jingphiah vote namar ba u Myntri u la wanrah ïa ka jingtyrwa ban wanrah ïa ka aiñ jong ka Riti synshar (One Hundred and Twenty-Ninth Amendment) Bill, 2024 and the Union Territories Laws (Amendment) Bill, 2024 ha Lok Sabha.
Ki la don haduh 269 ngut ki dkhot kiba la kyrshan bad 198 ngut pyrshah ïa ka. Ïa ki Bill lah ban phah sha ka komiti ba ïatreilang jong ar tylli ki ïingdorbar. Ka jingwanrah ïa kine ki Bill ka la bud sa ka jingshah thombor kaba jur da ki MP ka Congress, ka Samajwadi Party bad ka Trinamool Congress.
U MP ka Congress u Manish Tewari u la pyrshah ïa ki Bill na ka bynta ka ilekshon ha kajuh ka por ha ka ri, da kaba ong ba ki thombor ïa ka jinghikai ba kongsan jong ka Riti synshar ka ri.
