Imphal, Nohprah:
U Myntri Rangbah jong ka Manipur u N. Biren Singh ha ka sngi Balang u la kyntu ïa ki paidbah ka Senapati ba kin kyrshan ïa ki jingpyrshang ban wanrah biang ïa ka shongsuk-shongsaiñ ha ka jylla katba u kam ïa ka jingbym ïasngewthuh jingmut bad ka jingkulmar kaba la wanrah ïa ka jingduh ïa ki mynsiem briew bad ki jingdon jingem.
U la ong ba ki paidbah jong ka Senapati, khamtam ki seng bhalang (CSO) kum ka seng jong ki paidbah Naga, ka United Naga Council, bad ki seng jong ki samla pule bapher bapher, ki don ka bynta kaba kongsan ban pynneh-pynsah ïa ka jingïatylli, ka jinglong ba janai, bad ka jingïashong suk shongsaiñ jong ka Manipur.
“Baroh ki briew ki dei ban bakla, hynrei ka dei ban don ka jaka na ka bynta ka jingïapynbeit, ka jingïamap, bad ka jingïa-sngewthuh jingmut lyngba ki jingïalang bad jingïakren,” ong u Singh hadien ba la pynmeh ïa ka ding kum ka dak ban plie ïa ka tamasa RobvenaNi 2024 kaba lai sngi ha madan Asufii Robvena ha Punaname jong ka Senatapi.
U Singh u la pynbna ruh ïa ka jingthmu ban buh ha ki jaka ai jingsumar ïa ki tiar kiba kham kongsan kum ki kor MRI bad CT scan ha ki jaka lumthup, kynthup ïa ka Senapati, Tamenglong, Ukhrul, bad Chandel.
Haba pynpaw ïa ki jingbun ha ki jingtei, u Singh u la kdew ba ka jylla ka la ïohi ïa ka jingkiew kaba khraw ha ka jingpynïasoh ïa ki surok.
U la bynrap ruh ba u Myntri ka sorkar pdeng ba dei peit ïa ki surok bad ki surok bah, u Nitin Gadkari, u la mynjur kumba T.777 klur na ka bynta ban pynbha bad pynheh ïa ka surok Shangshak (Ukhrul) sha Tengnoupal.
U Myntri Rangbah u la pynpaw ïa ka jingpher jong ka jylla, kaba kynthup ïa 34-35 tylli ki jaitbynriew ba la ithuh, kiba kynthup ïa 24-25 tylli ki kynhun trai ri bad kiwei kiwei ki jaitbynriew kiba la slem bha.
U la pynpaw ïa ka jingtei ïa ka Sangai Ethnic Park, kaba don ïa ki ïing tynrai kiba pyni ïa kawei pa kawei ka jaitbynriew ba la ithuh ban pynroi ïa ka jingïatylli hapdeng ki jaitbynriew.
U Singh u la pynpaw biang ïa ka jingkular jong ka sorkar ban ïakhun pyrshah ïa ka jingma jong u drok, da kaba ong ba ka thma pyrshah ïa u drok, kaba la sdang ha u snem 2018, ka thmu ban ïada ïa ki pateng ban wan bad kam dei kaba la thmu ïa kano-kano ka kynhun kaba kyrpang.
U la pynksan ruh ïa ki jingpyrshang ban ithuh ïa ki nongwan buhai shnong be-aiñ lyngba ki kyndon jong ka riti synshar, ba la pynkhih da ka jingpynwandur da ki Satellite kaba la pynpaw ïa ki shnong bym pat ithuh bad ka jinghiar jong ka jingbun briew jong ki riewlum trai ri.
