New Delhi, Nohprah:
U Myntri Rangbahduh ka ri, Narendra Modi, u la kynnoh ba ka Congress kam shym la kyntiew ïa ka bha ka miat jong ki nongrep bad kam shym la ailad satia ïano ïano ban leh kumjuh.
U la kren ha ka jingïalang kaba la ai kyrteng “Ek Varsh-Parinaam Utkarsh” ha Jaipur ban rakhe shisnem na ka bynta ka BJP ka la thaw ïa ka sorkar ha Rajasthan.
U Modi u la kynnoh ruh ba ka Congress ka pynjur ïa ki jingïakajia halor ki um wah hapdeng ki jylla bad kdew ruh ïa ka jingkynnoh ba pynslem ban pyndep ïa ka Eastern Rajasthan Canal Project (ERCP) kum ka “jingpynshisha kaba beit” ïa ka “jingthmu” jong ka seng.
“Ka Congress kam ju kwah ban pynduna ïa ka jingeh ha ka liang ka um…Ka um jong ki wah jong ngi ka ju tuid sha shiliang ki pud, hynrei ki nongrep jong ngi kim shym la ïoh ïa ka jingmyntoi jong ka. Ha ka jaka ban wad ïa ka lad ban pynbeit, ka Congress ka la ïai bteng ban kyntiew ïa ki jingïakynad um hapdeng ki jylla,” la ong.
U Modi u la ong haba kren ha ka jingïalang paidbah ha Dadiya.”Ki kren heh ha ka kyrteng ki nongrep hynrei kim leh ei ei na ka bynta ki nongrep hi, bad kim ailad ruh ïa kiwei ban leh,” u la bynrap.
U Myntri Rangbahduh u la ong ba ka seng jong u ka thmu ban kyntiew ïa ka jingïakren hapdeng ki jylla, ym kum ka Congress .
“Ngi ngeit ha ka jingïatreilang, ym ha ka jingpyrshah. Ngi ngeit ha ki lad pynbeit, ym ha ka jingpynthut. Kumta ka sorkar jong ngi ka la mynjur bad pynheh ruh ïa ka Eastern Rajasthan Canal Project. Tang mar ïa thaw ïa ka sorkar BJP ha MP bad ha Rajasthan, la ïoh ïa ka jingïateh halor ka projek Parvati-Kalisindh-Chambal” ong ka tnad pathai khubor kaba la sot ïa ki jingkren u Modi.
U la pynleit jingmut ruh shaphang ka projek dam Sardar Sarovar ha Gujarat bad kynnoh ba ka “Congress bad ki katto katne ki seng treimon sngewbha” ki la shim ïa ki “buit” bapher bapher ban pynsangeh ïa kane ka projek.
“Ka Congress kam ju kwah ban pynduna ïa ka jingeh ha ka um…Ka um jong ki wah jong ngi ka ju tuid sha shiliang ki pud, hynrei ki nongrep jong ngi kim shym la ïoh ïa ka jingmyntoi jong ka,” bynrap biang u PM Modi.
Ha kane ka jingïalang, u Myntri Rangbahduh u la buh ruh ïa u maw nongrim na ka bynta 24 tylli ki projek kiba ïadei bad ka bor ding, ka surok, ka lynti rel bad ka um kaba shongdor palat T.46,400 klur.
U la ïathuh ruh ba ka projek Pravati, Kalisindh, bad Chambal kan ai ïa ki jaka pyntuid um bad umdih sha ki 21 tylli ki distrik jong ka jylla, bad ruh kan pynsted ïa ka roi ka par jong ki thaiñ khappud ha Madhya Pradesh.
U Modi u la kren ruh halor ka jingmih jong ka ilekshon Lok Sabha ha u snem 2024 bad ong ba ka jingai bor sha ka NDA na ka bynta ka sien kaba lai lynter ka long ka bynta ba kongsan bha na ka bynta ban pynsahkynmaw ne khana pateng.
U la ïaroh ruh ïa u Myntri rangbah ka jylla u Bajan Lal Sharma uba la “buh ïa ka nongrim kaba skhem na ka bynta ka roi ka par jong ka jylla.”
