New Delhi, Nohprah:
Kum ka jingai jubab halor ka khubor byrngem, ki kynhun ba ai jingïarap kyrkieh ki la leit sha kawei ka skul kaba don ha Delhi bad la pynkylla ïa ki klas sha ka Online, la ong ki pulit jong ka Delhi, kumba la kren da ka Business Standard.
Kane kam dei ka sien kaba nyngkong ba kum kine ki jingbyrngem ki pynthut ïa ki skul ha ka nongbah jong ka ri. Katkum ka jingïathuh jong ki pulit, la ong ba uwei u samla pule u la phah ïa ka Email byrngem sha ka skul jong u, bad hadien ba la wad ïa ka IP address, ka kynhun pulit ka la leit ban khynra hapoh ka ïingsah jong u.
Hadien ba la kylli jingkylli bad tohkit, utei u khynnah u la kam ba u la leh ïa kane ka kam ha kaba hadien kane la sneng bad ïasyllok bad u. La pyllait noh ïa u ha ryngkat ka jingmaham ïa ki kmie ki kpa jong u ban peitngor ïa ka jinglong jong u. Ha kajuh ka por, ha ka 14 tarik bad 17 tarik Nohprah, ki la don bun tylli ki skul ha Delhi kiba la ïoh ïa ki email byrngem buh bom.
Shuh shuh, ha ka 13 tarik u Nohprah, ki la don haduh 30 tylli ki skul ha kylleng ka nongbah Delhi, kiba la shah thombor da ki email byrngem buh bom ha kaba la lap ba ki dei kiba thok.
U Deputy Commissioner of Police ka South East Delhi u Ravi Kumar Singh haba kren halor ka jingbyrngem buh bom ha ka 13 tarik, Nohprah u la ong ba ka jingtohkit halor ki jingbyrngem thok la lap ba ki e-mail ba la phah sha ki skul ki dei kiba la pynmih na shabar jong ka ri.
