California, Nohprah
U Lat jong ka California, Gavin Newsom, u la pynbna ia ka jinglong-jingman kaba kyrkieh, halor ka jingwan jong ka jingpang Avian Influenza A (H5N1), kaba ju tip paidbah kum ka bird flu, kaba la ktah ïa 34 ngut ki briew ha katei ka Jylla, ong ka khubor jong ka CBS.
Katei ka jingpynbna kaba la pynmih ha ka sngi Balang, ka long hadien ka jinglap ïa ki masi khem dud ha ki jaka rep ha Southern California. Katkum ka jingong jong ka shlem treikam u Lat, kane ka jingpynkylla ka pynpaw ïa ka jingdonkam ban pynkhlaiñ ïa ki jingpyrshang ban buddien bad ban pynkhlaiñ ïa ka jingïakhun ha ka jylla baroh kawei ban tehlakam bad pynduna ïa ka jingsaphriang jong une u khñiang jingpang.
Ka jingpynbna pathai khubor na ka shlem trei-kam u Lat ka jylla ka la ong ba ym shym la lap satia ïa ka jingpang bird flu kan saphriang na u briew sha u briew ha California. La jan baroh ki briew kiba ïoh pang kidei kiba la ïakynduh beit bad ki masi kiba ïoh pang. Katkum ka khubor jong ka Xinhua, ka jylla ka la dep ban pyntreikam ïa ka rukom test bad buddien kaba heh tam ha ka ri ban ïakhun pyrshah ïa kane ka jingpang, ong ka tnad pathai khubor IANS.
Katkum ka jingtip na ka U.S. Centers jong ka Disease Control and Prevention (CDC), une u khñiang jingpang H5N1 mynta u la saphriang ha ki 16 tylli ki jylla hapdeng ki masi khem dud hadien ba la lap nyngkong eh ha Texas bad Kansas ha u Lber 2024. Ha baroh kawei ka ri, la ïoh jingtip ba ki don 61 ngut ki briew kiba ïoh ïa ka jingpang H5N1 naduh u bnai Ïaiong, kynthup ïa u nongpang ba jur bha uba la pynthikna dang shen ha Louisiana.
Hynrei ha California, ym shym la don satia kiba ïoh ïa ka jingpang da kaba saphriang na u briew sha u briew. Kiba bun ki briew kiba ïoh pang ha ka jylla ki dei kiba ïakynduh bad ki masi kiba ïoh pang. Ka tnad ka koit ka khiah jong ka California, ka ïathuh ha ka 13tarik Nohprah, ba ki don 33 tylli ki masi, kiba ïoh ïa katei ka jingpang khlam.
Ban pynduna ïa ki jingma, ka California ka la sam ïa ki tiar ïada sha ki jaka ri masi bad ai jingmut ïa ki nongtrei kiba ktah ïa ki masi ne ka dud bym pat shet ba kin pyndonkam ïa ki, ong ka website jong ka tnad ka koit ka khiah paidbah.
La lap nyngkong ïa ka jingpang khlam ha ki sim khlaw ha U.S. ha South Carolina ha u bnai Kyllalyngkot 2022 bad hadien la lap ïa ka ha ki sim khlaw ha California ha u bnai Naitung 2022.
