Srinagar, Nohprah:
Kiba bun na ki bynta jong ka Jammu & Kashmir bad Himachal Pradesh ha ka sngi Thohdieng ki la sakhi ïa ka jinghap ïor kaba jur bha, kaba la pynlong ïa ka jingdheng kali ha ki katto katne ki jaka.
Hapoh ka jingshah ktah jong ka jingthut ka suiñ-bneng na ka liang Sepngi, la ïohi ïa ka jinghap ïor kaba rit ha kiba bun ki jaka jong ka Kashmir, kynthup ïa ki jaka madan.
Ka jinghap slap, ka la sdang ha ki jaka ba kham jrong ha ka por mynstep, katba ki jaka madan, kynthup ïa ka Srinagar, ki la sakhi ïa ka jinghap ïor, ha ka por mynstep. Katkum ka jingong ki heh sorkar la ïoh jingtip ba lai inshi ka ïor ha ka nongbah Srinagar.
Lait na ka Srinagar, ka jinghap slap ba nyngkong eh jong kane ka aïom ka long ruh ha ki madan jong ka Ganderbal, Anantnag, Kulgam, Shopian bad Pulwama distrik.
Katkum ka jingïathuh jong ki heh sorkar, la ïohi ruh ïa ka jinghap slap ha ka jaka jngohkai pyrthei ba pawnam jong ka Gulmarg, ki jaka jngohkai pyrthei jong ka Sonamarg bad Pahalgam, Gurez, Zojila axis, Sadhna Top, Mughal Road, bad ha kiba bun ki jaka ha Bandipora, Baramulla, bad Kupwara distrik.
Kane ka jinghap ïor kaba jur ka la wanrah ruh ïa ka jingkhang khyrdep ïa ka surok bah Srinagar-Leh bad ïa ka surok Mughal. Ka leit ka wan ruh ka la shah ktah ha ka surok bah Srinagar sha Jammu, ha kaba haduh kumba 2,000 tylli ki kali ki la sahkut.
U Myntri Rangbah ka jylla Jammu & Kashmir, u Omar Abdullah, u ïathuh ba ka jingpyntreikam ban pynkhuid ïa ka ïor, ka dang ïaid shakhmat.
“Nga la ñiah kali na Jammu sha Srinagar mynta ka sngi. Ka ïor ka ïai hap naduh Banihal sha Srinagar. Ka jinglong jingman ka long kaba sniew bha. Nga sngewthuh ba ki don kumba 2000 tylli ki kali kiba sahkut hapdeng ka lynti krem & Qazigund. Ka ophis jong nga ka la ïakynduh bad ki bor synshar ha Shathie Kashmir.” Katba la pynkhuid ïa ka ïor na surok, ha kaba la sop da u thah. Ki kali heh ki la ïoh jingbit ban ïaid bad ki jingpyntreikam ki dang ïaid shakhmat ban pynkhuid ïa kiwei pat ki kali kiba sahkut,” la thoh u Abdullah ha ka jingthoh ha ka rynsan X.
Ka India Meteorological Department (IMD), ka la ïathuh ba ka jinglong ka suiñbneng, ka lah ban nang kham bha nangne shakhmat.
Kumba san hajar ngut ki nongjngohkai pyrthei kiba sahkut lynti ha Solang Nala, ski Resort ha Kullu jong ka Himachal Pradesh, la ïoh ban pyllait im da ki pulit ka Himachal Pradesh ha ka sngi Thohdieng, hapdeng ka jinghap slap kaba jur bha ha katei ka jylla, ong ka tyllong khubor.
Ki pulit jong ka Kullu ki la ïathuh ba la sdang ïa ka jingpyllait im ha ka 27 tarik u Nohprah hadien ba kumba 1000 tylli ki kali ki la sahkut ha Solang Nala.
“Namar ka jinghap ïor biang ha ka 27 tarik, ki la don kumba 1000 ngut ki nongjngohkai pyrthei bad kiwei kiwei ki kali ki la sahkut ha Solang Nala. Ki don kumba 5000 ngut ki nongjngohkai pyrthei ha kine ki kali. Ïa ki kali bad ki nongjngohkai pyrthei la pyllait im da ki pulit ka Kullu bad la ïalam sha ki jaka ba shngaiñ.” Ka jingpyntreikam ka dang ïaid shakhmat,” la ong ki pulit jong ka Kullu ha ka rynsan X.
Ka jinghap ïor bad ka jinghap slap kaba jur ha ki hynriew tylli ki distrik jong ka jylla ha kane ka sngi Thohdieng, ki kynthup ïa ka Lahaul-Spiti, Chamba, Kangra, Kullu, Shimla, bad Kinnaur.
Ka tnad ba dei khmih ka la ai jingmut ïa ki nongshong shnong bad ki nongleit jingleit ba kin long kiba husiar bad shim ïa ki lad jingïada kiba donkam, khamtam ha ki jaka ba shah ktah ha ka ïor, ha kaba la khmih lynti ba kan don ka jingkhang bad jingthut ha ki surok.
