Srinagar, Kyllalyngkot:
U Myntri Rangbah jong ka jylla u Omar Abdullah ha ka Sngi Palei u la pynpaw ïa ka jingkyrmen ba ka jinglong Union Territory jong ka Jammu & Kashmir ka dei ka bynta kaba shipor bad ba ka sorkar kmie kan pyndep ïa ka jingkular jong ka ban pynïoh biang ïa ka jinglong jylla jong ka.
Ha ka jingïalang banyngkong eh jong ki lad pathai khubor hangne naduh ba u la shimti ïa ka kam ha u bnai Risaw, u Myntri Rangbah jong ka J&K u la pynpaw ïa ka jingkyrmen ba ki jingkular ba la ai da ka sorkar kmie ban pynphai biang ïa ka jinglong jylla jong ka Jammu & Kashmir kan urlong kloi katba lah.
“Ka la long ar bnai tam naduh ba ngi la wan ha ka bor. Ka la shim por ïa ngi ban sngewthuh kumno ka sorkar UT ka treikam. Ngi la ïadei bad ka sorkar kham mynshwa, hynrei ka don ka jingïapher kaba khraw hapdeng kata ka dur bad ka dur kaba mynta,” la ong u Abdullah. “
U Abdullah u la kyntait ïa ki khubor kiba la ai jingmut ïa ka jingpynbor na ka National Democratic Alliance (NDA) kaba la ïalam da ka BJP ban pynkylla ïa ka rukom pyrkhat jong ka National Conference bad ban pynïasoh bad katei ka seng.
“Kam don kano-kano ka jingpynbor na u Myntri Rangbahduh, u Myntri ka tnat ki kam pohïing ne ka Raj Bhawan ïa ngi ban pynkylla ïa ka rukom pyrkhat jong ngi,” u la ong.
U Myntri Rangbah u la bynrap ba u la ïoh ïa ka jingpynthikna na u Myntri Rangbahduh bad u Myntri ka tnat ki kam poh ïing ba ka sorkar National Conference kan neh bad ba kin ïoh ïa kajuh ka jingïatreilang kaba la pynjlan kham mynshwa sha u Lieutenant Governor kham mynshwa.
“Ki la pynpaw ba kin burom ïa ka jingbthah jong ki paidbah. Kito kiba pynphriang ïa ki khubor ba mynta ngan ïasoh bad ka NDA bad ba nga la pynkylla ïa ka jingmut jingpyrkhat jong nga, ngam lah ban ïarap ïa kata. Nga don hangne ban trei bad ngan trei,” u la ong.
Haba jubab ïa ka jingkylli hato ka sorkar jong u ka thmu ban leit sha ka iingbishar na ka bynta ban pynphai biang ïa ka jinglong jylla, u Abdullah u la ong ba ka jingïaleh pyrshah ka dei ban long ka lad kaba khatduh.
“Tang ban leit sha ka ïingbishar kan long ka jingïaleh. Ka jingïaleh kam dei ban long satia ka lad kaba nyngkong, ka dei ban long ka lad kaba khatduh. Lada ka Supreme Court kam shym la kren shaphang ka jingpynphai biang ïa ka jinglong jylla, lada u Myntri Rangbahduh bad u Myntri ka tnat ki kam pohïing kim shym la kren shaphang kata, te ngi lah ban leit sha ka ïingbishar. Ki la ai jingkular bad ngi hap ban ailad shwa ïa ki,” u la ong.
“Ka Supreme Court ha ka rai jong ka ka la pynpaw ruh ba dei ban pynphai biang kloi katba lah ïa ka jinglong jylla. Shi snem ka la ïaid naduh kata ka por bad ngi pyrkhat ba shi snem ka dei ban biang,” la ong u Abdullah.
U Myntri Rangbah ka Jammu and Kashmir, u kren ïa kane ha ka jingïakren bad ki lad pathai khubor ha Srinagar, ha ka sngi Palei, ka 2 tarik, Kyllalyngkot, 2025.
Ha kane ka jingïakren u la kren sani bha halor ki jinglong jingman hadien ba la pynduh jylla ïa ka J&K khamtam ka jingktah ïa ki nongshong shnong.
U Myntri Rangbah u la shim jingkylli halor ki mat bapher bapher kiba ïakynduh ïa ka sorkar jong u kaba la neh ar bnai, kynthup ïa ka jingtreikam jong ka sorkar ba la jied kaba hap ban ïasam bor bad uba la shahjied bad shah thung jong ka sorkar kmie — u Lat ka jylla.
U la kynthoh ba “ki ar tylli ki pdeng jong ka bor kim long kiba myntoi” bad ba ka jingsynshar kaba treikam bha ka long kaba bha tam da kawei ka rukom hukum.
Haba u la kam ïa ki katto katne ki jingïapher jingmut bad ka Raj Bhavan, u Abdullah u la ban jur ba kine ki jingbym ïasngewthuh jingmut kim long kiba jur kumba la antad.
“Ka paw shai ba ki ar tylli ki pdeng jong ka bor kim long na ka bynta ka jingmyntoi jongno-jongno ruh. Lada ki ar tylli ki pdeng ki dei ki tiar kiba treikam bha ha ka jingsynshar, phin sa ïohi ïa ka ha manla ki jaka,” u la ong.
