U Nongsaiñ Hima,1986
Uwei pa uwei u briew nalor ba u dei ban ïoh ïa ka bam ka sa, ka jaiñ ka nep, ka ïing ka sem, u dei ban ïoh ruh ïa ki jinghikai shong tynrai. Kawei na kita ki jnghikai ban long – ban mut ia kaba bha, ban leh ia kaba dei bad ban kren ïa kaba shisha. Dei namar kata ïa u khynnah, ba ki skul la ju ïai ban ïai long ïa u ban mut ïa kaba bha, ban leh ïa kaba dei bad kren ïa kaba shisha.
Ki Khraw Pyrkhat ki la sngewdonkam ban buh ïa kitei ka jinghikai shongtynrai ha ka sur, khnang ba u khynnah un lah ban kynmaw da kaba rwai ba kan lah ban long doh long snam ban ïai tuid khlem sangeh ha ki thied jong ki jingpyrkhat jong u U Riewstad u ong “Hikai ïa u khynnah ha ka lynti ba u dei ban ïaid, te um ym bakla wat ynda u la tymmen.”
Ka jingkylli kaba mih ka long, kum ka Jaidbynriew ngi ju pyrkhat ne em ban bsuh ha ka jabieng bad dohnud jong ki khynnah bad samla ïa ki jinghikai shongtynrai kiba bha. Ngi ud ngi nam ba ka longbriew manbriew ka la burom. Ngi ïohsngew ruh narum naneng na ka khlieng ka tyngab ba ka burom ka akor ka la hiar than eh.
Teng teng sngewlyngngoh hi jlang ban tip ba ki briew kiba sngewdei bad bym sngewrem ban shim ïa ki mar ki mata, ki tyngka ki pisa kiba ym dei hok ki jong ki. Shan kata ka HOK, shano kata ka Jingshisha.
Ban tip ba ka dei ka jingshisha bad ban ym nud ban kren kumba ka long, ka dei tang ka jingkhawpud. U Riew stad u ong, “Ki khawpud ki iap bunsien, shuwa ba kin dkut mynsiem, hynrei ki riewshlur ki mad ïa ka jing-iap tang shisien.” Bun ki briew kiba khraw ki la duh ïa la ka jingim namar ba kim riej ban kren ïa ka jingshisha. Uwei u Rangbah jong ka Ri America u Abraham Lincoln shisien u la rem ha ka Election kaba u ïaleh namar ba u kren tang ïa ka jingshisha. Ki paralok jong u ki la dom ïa u, namar ba um nang ban kren. Hynrei u Abraham Lincoln kum u Rangbah, Rangkynsai, u Rangkynih, u Rangphawar khlem jingsheptieng u la jubab, “Ym dei tang ia nga ban shu jop hynrei ban bat skhem ïa ka jingshisha.”
Kum ka jaidbynriew, ngi U Paid Khasi hangno ngi don mynta ? Hato ngi la dei ban kyndit naba thiah bad ban bsuh ha ki khynnah bad samla jong ka Pateng Mynta ban mut ïa kaba bha bad leh ïa kaba dei bad kren ïa kaba shisha. Haba shu kren lyngkot ban im tipbriew tipbeli la im la ïap. Kum ban shu pynkynmaw ha ka Muhor jong ka Ri India la buh ïa kine ki kyntien “SATYAMAVE JAYATE.” Ha ka ktien Khasi kaba lyng-kot lah ban ong, “Dei Tang Ka Jingshisha Kaba ïeng Rasong.”
