Guwahati, Kyllalyngkot:
Ka Guwahati Metropolitan Drinking Water & Sewerage Board (Guwahati Jal Board) ka la pynbna ban ai jingïarap pisa T.4.8 lak na ka bynta ki longïing kiba la shah ktah na ka jingbthei kaba jur jong ki pipe um kaba la jia ha ka thaiñ Kharghuli jong ka Guwahati ha ka sngi Palei jong ka taïew ba la lah.
Kane ka jingbthei jong ki pipe um, kaba la jia hapoh ka Guwahati Water Supply Project (GWSP) kaba la ïarap da ka Japan International Cooperation Agency (JICA), ka la pynjulor ïa ki katto katne tylli ki ïing ha kane ka thaiñ.
Katkum ka hukum ba la pynmih da u Managing Director u Pallav Gopal Jha, ïa kane ka bai lutksan la mang katkum ka kyndon 80 jong ka ‘Guwahati Metropolitan Drinking Water & Sewerage Board Act, 2009’.
Ïa kane ka pisa ba la ai jingmynjur ba T.4.8 lak yn sam sha ki saw ngut ki briew ha kaba ki ïing jong ki ki la shah pynjulor bha, kiba kynthup ïa ka longïing u Anowar Hussain, u Abu Fateh Ahmed, u Moumin Seikh, bad ka Binita Das, kine kin ïoh mar T.1,20,000.
Na ka liang jong ka Guwahati Jal Board ka la pynthikna ba yn ai jingïarap shuh shuh lada donkam.
Ka jingbthei jong u pipe um ba dang shen ha Kharghuli ka la pynmih ïa ka jingsngewkhia kaba jur bha halor ka jinglah ban ïakhun jong ki jingtei hapoh ka projek pynpoi um Guwahati kaba la kyrshan da ka JICA.
Kane ka jingjia, wat hapdeng ka jingthmu jong ka projek ban pynbiang ïa ka um dih kaba lah ban shaniah sha ka Guwahati, ka buh jingkylli shaphang ka jingsahteng kaba shim por jong ki thong jong ka projek.
U pipe um uba heh bha u la bthei ha ka thaiñ Kharghuli jong ka Guwahati ha ka step jong ka sngi Palei, ka 2 tarik u Kyllalyngkot, ha ka por kumba 10:15 baje mynstep, kaba la wanrah ïa ka jingjulor kaba jur ïa ki jingdon jingem bad ki mar ki mata.
Kane ka jingjia ka la pynjulor jur ïa palat san tylli ki ïing, hynñiew tylli ki kali, bad bun tylli ki jaka treikam.
Ha kajuh ka por, u nongïalam ka Liang Pyrshah (LoP) u Debabrata Saikia u la rah ïa ka jingujor sha ka Assam Human Rights Commission (AHRC) halor ka jingbthei jong u pipe ba kit um ha ki thaiñ Kharguli ha Guwahati.
Hadien ka jingjia kaba kum kane kaba la jia ha ka 25 tarik, Jymmang, u Saikia u la ujor ar tylli ki jingujor sha ka AHRC pyrshah ïa ki tnad kiba don ka jingkitkhlieh ban buh bad maramot ïa ki pipe.
Ha ka jingujor jong u, u Saikia u la ong, “Da kaba pyrkhat ïa kiei kiei kiba la kdew haneng bad na ka bynta ka jingmyntoi paidbah kaba kham khraw, nga kyntu ïa phi ban shimkhia ïa kane ka jingjia bad ban shim ïa ki lad ki lynti kiba donkam ban pynthikna ba ka tnad/Board ba dei peit kan kham kitkhlieh khnang ba ki jingduna kiba lah ban mih na ka jingstad bad buit treikam kin lah ban long ki lad ki lynti kiba lah ban pynsngewthuh bad pynbha la shim mardor katkum ka jingdonkam ban ïada na ka jingwan biang jong kum kine ki jingjia bad ban pynthikna ïa ka jingshngaiñ ïa ka jingim bad ki jingdon jingem jong ki paidbah.”
Halor katei ka jingjia kaba dang shen, ka Guwahati Jal Board ka la pynsangeh noh ïa ka um jong ka nongbah haduh lai sngi khnang ban pynsuk ban maramot bad ban ïada na ka jingshah pynjulor nangne shakhmat.
