New Delhi, Kyllalyngkot:
U President jong ka seng BJP, u Jamal Siddiqui, u la thoh shithi sha u Narendra Modi, Myntri Rangbahduh ka ri, da kaba kyntu ïa u, ba un pynkylla kyrteng noh ïa ka India Gate, kum ka “Bharat Mata Dwar”.
U Siddiqui ha ka shithi jong u, u la kynnoh ba ka sorkar hapoh u Modi, ka la trei ban pynkoit ïa ki jingmynsaw ba la pynlong da ki “nongwan hiar thma Mughal” bad “ki nonglute jong ka ri Bilat”, da kaba ong ba ka la pynsngewbha ïa ka ri da kaba pyndam noh ïa ki jingjakhlia jong ka jinglong mraw.
“Ka jingpynkylla kyrteng ïa ka India Gate kum ka Bharat Mata Dwar kan long ka jingburom kaba shisha ïa ki hajar ngut ki riew ïeid ri, kiba la leh ia ka jingainguh kaba khraw tam bad kiba la thoh ïa ki kyrteng jong ki ha ka jingtei jong ka,” u la ong.
U la kdew ba ka sorkar u Modi ka la jer kyrteng biang ïa ka surok kaba la ai kyrteng da u Aurangzeb kum ka A P J Kalam Road bad buh ruh ïa u mot jong u Subhas Chandra Bose ha ka kynroh kaba la buh ïa u mot jong u Syiem George V. La weng noh ïa u mot jong u syiem phareng ha u snem 1968 bad ka jingtap ha India Gate ka la sah thylli.
La pynkylla kyrteng ïa ka Raj Path kum ka Kartavya Path, kaba pyndap ïa ka bad ka kolshor jong ka ri India, u la ong, da kaba bynrap ba ïa ka kyrteng Bharat Mata Dwar lah ban ai ïa ka India Gate ha kajuh ka rukom.
