Bertina Lyngdoh
Phi dei ka tyllong ka jingstad kaba u briew u kup u phong shirynïeng. Lait na ïing sa ha phi, jingstad ban khamti. Ka jingtbit bad ka jingkham tbit ban poi sha kliar ka thong, nyng-kong eh dei lyngba jong phi. La u ne ka, ki bit ki pnah ha ka kren ka khana, ka thoh ka tar, haphi long ka kyrteng junom. Ka jingsdang sha ka lynti ka lawei, ruh dei na phi. Na ka tyllong bad ka thymmei jong phi, baroh ngi tip i’u A i’u B. Naduh ka sngi nyngkong haduh ka sngi basan, bad naduh u khyndai kynta haduh lai kynta, baroh ngi shong bad pynlut por haphi khnang ban ïoh ïa ka jingnang jingstad ba pura bad ban kynjoh sha ka thong.
Te kumta, phi dei ka kmie, jingstad ïa u khun u hajar ban proh ha ka pyrkhat pyrdaiñ, ka kren ka khana, ka akor ka burom, ka thoh ka tar. Namar kata la bun bun snem kynthih, phi la shakri ïa u paid u hajar ba jingstad kan long ka pansngiat ksiar ïa ki. Phi la bsa la btiah ïa ki hajar ngut da ka jingnang jingstad bad ban pynjanai ïalade khamtam ha ki sap kyrpang. Phi la shakri ruh ym tang ban tip ïa u A u B, hynrei wat ban sngewthuh bad kren ïa ka ktien ki nongwei nuksa, ka ktien phareng, ka ktien hindi. Phi dei ka kmie pdeng ban ïoh phong ïa ka jingstad, ruh ka kmie pdeng ban nang pynroi ïa ka jingnang jingtip. Ka skul kyrpang te phi dei khamtam ïa ki hep rit ba kin nang jam sha ka jingnang jingstad ha ka rta ka jong ki. Bun ki sur ba bang ngi nang na phi bad sah jingkynmaw ïa ki bad da kumne ngi rwai pateng pat ïa ki ha ki khun pateng jong ngi. Phim kheiñ shiliang ïano-ïano ruh, phi pdiang ïa kat kiba donkam ban sdang ka jingnang jingstad na phi. Phi ai ki jinghikai ban ïa long kawei kata hapdeng u rit u khraw, u khasi u mynder. Sngew bynñiaw pat, ba hadien ka jingshakri jongphi da ki snem ïa ka jingnang jingstad, la hap ban pynsangeh shwa ïa ka pule puthi namar ka jingdonkam ban maramot bad pynbha noh ïa ka naba ka jingrim palat ka jingtei ïa phi. Da ki spah ngut kin duh ïa ka jingmyntoi na phi tad haduh ba phin ïoh shakri biang sa shisien yn tei te da kaba thymmai naba ka jingdawa jong ka, hynrei lada na sharud shakiar pat ki bun ki jnit ki jnat bad lehse kaba long kum ka jingpynslem ban tei thymmai ïaphi, kine keiñ ki dei ki daw kiba buh ïa kiba bun ha ki jingkylli lym ruh ki jingpyrkhat. Kan kham biang te ïa ngi ban ïeh ha kito kiba don ka bor ki nongpynïaid jong ka.
Te namarkata, ki jingkyrmen na u ba bun balang ba phin lah ban wan shakri biang kumba phi la ju shakri ka jingtei thymmai bad jingpynbha ïa phi kan wanrah ïa ka jingbha jong baroh lang. Ngi ngeit skhem ba ki kam pynbha kin long kloi ba uba la duh ïa phi ha ka bteng ïa ka pule puthi, un ïoh biang ban bteng sa shisien. Ngi kyrmen ba ka lad ka lynti babha kan plie, naba bun un ïoh phong biang ïa ka jingnang jing stad ba pura naphi.
