Imphal, Kyllalyngkot:
Ki bor pahara ki la kem ïa ar ngut ki dkhot jong ka kynhun ba la khang pyrshah jong ka KCP (Taibanganba) na ka thaiñ Langmeidong jong ka Kakching distrik.
Kine ki riew shimet kiba la shah kem la tip kyrteng kum u Mayanglambam Sanathoi Singh (30) bad u Sanasam Suraj Singh (27) bad la kynnoh ba ki donkti ha ki kam dawa pisa ha ki thaiñ Sugnu, Chairel, bad Kakching Khunou kiba hap hapoh ka Kakching distrik.
Kane ka jingkhynra ka dei shi bynta ban pynshitom jur ïa ki kam lehnoh ha katei ka thaiï. Ki heh sorkar ki la pynthikna ba kine ki arngut ki la donkti bha ha ki kam dawa pisa, da kaba thmu ïa ki jaka barit paid ban bei tyngka halor ki kam jong ka seng.
Ha ka jingpyntreikam kaba ïadei bad kane, ki bor pahara ki la pynlong ïa ki jingwad bad ki jingtreikam ban synshar ïa ki jaka ha kylleng ki jaka ba marjan bad ki jaka ba rit paid jong ki lum bad ki them jong ka Manipur.
Ha ka jingleit khynra ha ka thaiñ Saheibung Peak ha shilynter jong ka surok Zero Point-Kotzim kaba hap hapoh ka jingpeit jong ki pulit ka New Keithelmanbi Police Station ha Kangpokpi distrik, la ïoh kurup ïa ki tiar siat kiba bun bha.
