Ahmedabad, Kyllalyngkot:
Ki la don baroh kumba 609 tylli ki jingujor ejahar bad la kem ïa kumba 612 ngut ki briew ha Gujarat namar ba ki shna, die bad buh ïa ki tiar ba la khang bad ñiew beaiñ kum ki ksai Nylon, Lantern bad ki ksai mynja da ki ïit na ka bynta ka jinglehkmen ha Uttarayan, la ïathuh ka sorkar ha ka ïingbishar jong ka High Court ha ka Lah Sngi U Blei.
Ha ka Affidavit ba la ai kum ka jubab halor ka PIL kaba pan jingbthah na ka HC ban khang ban pyndonkam ïa ki ksai mynja China, ki ksait ba la khleh bad ki ïit bad kiwei pat ki jait tiar ba la pyndonkam ban khleh ha ki ksah na ka bynta ban shor ïa ki kotkudi ha ka sngi lehkmen ka ba la pynlong hynnin ka sngi, ka tnat ki kam pohïing ha Gujarat ka la ong ba hapdeng ka 9 tarik, Kyllalyngkot bad ka 12 tarik, Kyllalyngkot, ki pulit ki la buh da ka jingujor ejahar pyrshah ïa ki 99 ngut ki nongshna bad nongpynmih kum ïa kine ki jait ksai, 50 ngut ki nongdie stok bad 404 ngut ki nongdie ïa kine ki ksai ha kylleng ka jylla Gujarat.
La kurup ruh ïa kine ki jait ksai kiba la kot sha ka T.23.75 lak, la pyntip sha ka ïingbishar. Kine ki jait ksai ïa kiba la shah khang pyrshah ban pyndonkam kiba la kot sha ka T. 23.75 lak la kurup noh, la pyntip ha ka ïingbishar.
Lyngba ka jingpynbna ba la pynmih ha ka 24 tarik u Nohprah, 2024, ka sorkar jylla ka la khang syndon ïa ka jingshna bad die ïa ki Lantern China, ki ksai nylon bad ki plastik bad ki ksai ba la khleh mynja ha ryngkat ki bilor ne ïit bad kiwei kiwei ki jait tiar ba ju khleh kiba lah ban pynmynsaw bad buh jingma ïa kiba bun.
Ka tnad ba dei khmih ka la ong ba naduh ka 10 tarik, Kyllalyngkot, la pyndonkam ïa ki Social Media jong ki jaka treikam jong ki pulit ka nongbah bad kiwei kiwei ki bor synshar jylla ban phah ïa ki khubor ba la ïohsngew pyrshah ïa ka jingpyndonkam ïa ki tiar ba la khang da kaba bud ryntih ïa ka hukum jong ka ïingbishar ha ka 10 tarik, Kyllalyngkot.
