Guwahati, Kyllalyngkot:
Ka kynhun ki pulit ka Assam ka la ïoh ban kem ïa lai ngut ki briew kiba suba donkti ban khaïi drok ha ki thaiñ Sonai Rangirghat jong ka Cachar distrik.
Kane ka jingkhynra ba la pynshong nongrim na ki kaiphot jong ki bor wad bniah, ka la pynlong ban kurup haduh 9 hajar tylli ki dawai kuli Yaba kiba shongdor palat T. 2 klur ha ka ïew bar ri .
Kine ki briew ba la shah kem la tip kyrteng kum u Prabindra Riyang, u Baharul Islam, bad u Prabhat Barman, ki dang don ha ka jingshah tohkit mynta. Ki pulit ki la ïathuh ba ka jingwad bniah halor ka jaka ba wan une u drok ka dang ïai bteng.
U Yaba u dei u jait dawai Methamphetamine ba la pyndonkam bakla bha ha ki thaiñ Shatei- lam-Mihngi jong ka Asia, khamtam ha ki ri kum ka Thailand, Myanmar, bad Bangladesh.
La tip ruh ïa u kum u “dawai ba jubor” lane “bad u drok ba jubor.” Ki dawai Yaba ki ju don ïa ka jingkhleh lang jong u drok bad ka Caffeine, kaba lah ban pynmih ïa ki jingktah kiba bun jait.
