Srinagar, Kyllalyngkot:
Ka ‘jingpang kaba phylla’ ka la shim ïa ka jingim jong 14 ngut ki briew hapoh 30 sngi hadien ba la ïoh jingtip ba la don sa ar ngut kiba ïap ha ka Sngi Ba-ar ha ka thaiñ Rajouri jong ka Jammu & Kashmir.
Na ki 14 ngut kiba la khlad ki kynthup ïa 11 ngut ki khynnah bad 3 ngut ki rangbah na ki lai tylli ki longïing kiba don ha ka shnong ba don kham jngai na ka jaka sor jong ka Badhaal jong ka Koteranka Sub-division.
Napdeng ki briew kiba dang ïap shen ki kynthup ïa kawei ka khynnah kynthei kaba la 6 snem ka rta, kaba kyrteng ka Safina Kousar, kaba la khlad noh ha kawei ka hospital ha Jammu, ha kaba katto katne ngut ki para jong ka, ki la khlad noh ha kine ki khyndiat sngi ba la leit. Arngut kiwei pat ki para jong ka ki dang ïakhun bad ka jingim.
Katkum ka tyllong khubor ba la ïohlum, la ong ba khyndai ngut ki briew kiba dei na ki ar tylli ki longïing ki la ïap ha katei ka shnong ha u bnai ba la lah.
Ha ka jingkhmih bniah kaba hashwa, la ong ba ka jingïap jong kine ki briew ka dei na ka daw jong ka jinglong bih jong ka jingbam kaba ki bam.
Hynrei, katba nang ïaid ki sngi haba la shem ba kiba bun ki nongshong shnong ki la ud shitom bad don ïa kijuh ki dak ki shin, ka sorkar ka la khot ïa ki stad ba dei khmih na kiba bun ki jaka ai jingsumar kiba don hapoh ka ri ban wad bniah halor ka jingpang.
Ka sorkar Jammu & Kashmir, ka la pyntreikam ïa ki kynhun jong ka koit ka khiah bapher, ban wad bniah ïa ka daw jong kane ka jingpang bad ban khanglad ïa ka jingnang bteng jong ka jingïap jong ki briew. La lum ïa ki nongmuna na ki jingbam, ka um, bad ki briew kiba shah ktah ban tip ïa ka tynrai jong ka jingpang.
Ki heh jong ka tnat ka koit ka khiah ki la buh ha katei ka thaiñ, ryngkat bad ka kynhun sumar kaba treikam bad ka kali kit nongpang kiba la khreh ban pynbeit ïa kino kino ki jingdonkam kiba mih ha ka liang ka koit ka khiah.
Ka tnat ka koit ka khiah, kaba la ïalam da u Health Director u Dr Rakesh Mangotra bad u Chief Medical Officer jong ka Rajouri u Dr Manohar Rana, ki la khmih bniah ïa ki jingdonkam ha kaba ïadei bad ka jingwad bniah halor ka jingpang.
Ka kynhun na Pune’s National Institute of Virology, ryngkat ki riew shemphang na PGI Chandigarh, AIIMS Delhi, bad ka National Centre for Disease Control (NCDC), ki la dep ban leit jngoh ïa katei ka shnong ban kyrshan ïa ki jingtohkit ha ka thaiñ.
U Dr Ashutosh Gupta, uba dei u Principal jong ka Government Medical College Hospital ha Jammu, u la ai jingmut ba ka daw ka lah ban dei na ka jingpang khlam hynrei u la maham ba dang donkam shuh shuh ki jingpule na ka bynta ban lap ïa ka jingpang kaba thikna.
U Deputy Commissioner jong ka Rajouri, u Abhishek Sharma, u dang peit ïa ki jingpyrshang ban ai jingïarap, da kaba pynthikna ba ki kynhun jong ka koit ka khiah kin shah pyntreikam na ka bynta ka jingwad bniah bad ka jingshim nuksa.
“Ngi dang trei baroh shisngi ban wad bniah ia ka jinglong jingman bad ban pynduna ïa ka jingsaphriang ka jingpang”, la ong u Sharma.
Ki bor pynïaid distrik ki la kyntu ïa ki nongshong shnong ba kin ïatreilang bad ki kynhun jong ka koit ka khiah, ban ai jingtip ha ka por kaba biang na ka bynta ban wad ïa ki nongpang (Contact Tracing) bad ban tohkit shuh shuh.
La buh ïa ka District Control Room ban ïarap ïa ki paidbah ha kino kino ki jingeh kiba ïadei bad ka koit ka khiah.
“Ngi shimkhia ban pynthikna ïa ka jingshngaiñ bad jingbha jingmiat jong ki nongshong shnong jong ngi, bad ngi pan ïa ka jingkyrshan na ki paidbah ha kane ka por ba ïakynduh ïa kine ki jingeh,” ong uwei na ki heh sorkar na ka kynhun ki bor pynïaid distrik.
