New Delhi, Kyllalyngkot:
Ka seng Bharatiya Janata Party (BJP) ha ka sngi Thohdieng jong ka taïew ba la lah, ka la kular ban ai jingïarap mar T.2,500 shi bnai sha ki kynthei, bad T.21,000 sha ki longkmie armet, ha ka mat treikam jong ka, na ka bynta ka ilekshon Assembly sha Delhi.
Ka mat treikam jong ka BJP, kaba la pyllait paidbah da u Myntri ka sorkar kmie bad u President jong ka seng, u Jagat Prakash Nadda, ka la kular ruh ban ai ïa ki Cylinder LPG ha ka dor T.500 sha ki kynthei na ki bynta kiba duk, kawei ka Cylinder khlem jingsiew ha ka Holi bad Diwali ha Delhi.
Ka BJP ka la kular ruh ban buh ïa ki Atal Canteen ha ki JJ Clusters ban pynbiang ïa ki jingbam ba tei met ha ka dor T.5. Ka baibam tymmen kaba T.2,500 kiba hapdeng ka rta 60 haduh 70 snem, bad T.3,000 ïa kito kiba la kham heh 70 snem, ki dei ki jingkular ba la wanrah da ka BJP.
“Ha u snem 2020, ngi la ai 500 tylli ki jingkular, bad ngi la pyndep 499 tylli-da kaba lah ban pyndep haduh 99.99 percent. Ha u snem 2019, ngi la kular 235 tylli ki jingkular bad pyndep 225 tylli, bad kiba sah ki dang don ha ka kyrdan pyntreikam, da kaba poi sha ka 95.5 percent ka jingpyndep. Ka jingthmu ba kongsan jong ngi ka dang sah ha ka bha ka miat, ka jingsynshar kaba bha, ka roi ka par, ka jingpynkupbor ïa ki kynthei, bad ka jingkiew jong ki nongrep,” ong u Nadda ha ka jingïalang bad ki nongthoh khubor ban pynlait paidbah ïa ka ‘Sankalp Patra’ jong ka seng na ka bynta ka ilekshon ha ka 5 tarik, Rymphang.
“Ka ‘Sankalp Patra’ jong ngi ka dei ka nongrim na ka bynta ka Delhi kaba la kiew. Baroh ki skhim jingïarap kiba la don lypa kin dang bteng,” bynrap biang u Nadda.
