Mumbai, Nailar:
Ka Bombay High Court ha ka lah sngi U Blei ka la bthah ïa ka FDA jong ka Maharashtra ban siew bai lutksan kaba T.5 lak sha kawei ka dukan die jingbam thiang kaba don ha Pune namar ba ka la pynsangeh ïa ka laisen jong ka watla ka la don ka kaiphod kaba 98 percent ka la kohnguh, da kaba kdew ba ka jingthmu jong u nongpynïaid ka long kaba dei ban ai jingïaroh hynrei ka la ïaid “palat”.
Kane ka dukan kaba la tip kyrteng kum ka Gurunanak Dairy and Sweets ka la tuklar ïa kane ka jingleh jong ka FDA ha ka ïingbishar kaba heh bad ka la ong ba ka la duhnong T.8.74 lak ha ka khajna naduh ba la khang ïa ka ha u bnai Jylliew.
Ka ïingbishar jong u Acting Chief Justice Ravindra Ghuge bad u Justice Gautam Ankhad ki la ong ba ka hukum jong ka tnad pynïaid dawai ban pynsangeh ïa ki laisen jong ki jaka bam bad ki hotel ka dei ka “policy kaba phylla bad kaba bakla”.
Ha kajuh ka por, u Commissioner ka FDA, u Tukaram Mundhe, u la ïathuh ha ka PTI ba un sa bishar bniah ïa katei ka hukum shwa ban jubab. Ka ïingbishar, katba ka ailad ïa katei ka dukan ban plie biang ïa ka kam jong ka, ka la bthah ïa ka tnad, ba kan siew bai lutksan T.5 lak, ïa ki trai dukan, hapoh shibnai.
“Ngi la ïohi ba ka jingthmu jong phi ka long kaba dei ban ai jingïaroh bad katto katne ki tnad ki la ïeng lypa. Hynrei phi ïaid palat pud. Phi la dei ban weng noh mardor ïa ka jingpynsangeh ïa ka laisen shisien ba phi la ïohi ba 98 percent ka jingbud ryntih (ha ka kaiphod jong ka jingpeit bniah biang),” la ong ka kynhun nongbishar.
Ha ka dorkhas la kdew ba uwei u ophisar jong ka FDA u la jurip ïa ka jaka jong ka dukan ha ka 12 tarik u Ïaïong hadien ka jingujor ba la don ka jingsma ha ki jingbam, bad u la pynpaw ïa ka jingsngewkhia halor ka jingkhuid jingsuba bad ka jingkhuid jingsuba jong ki nongtrei.
Ha kane kajuh ka sngi, ka tnad ka la pynmih ïa ka hukum ban pynsangeh noh ïa ka laisen jong katei ka dukan.
Katei ka dukan ka la ujor hakhmat u FDA Commissioner bad ka la ai ruh ïa ka kaiphod jong ka jingbud ryntih. Ha ka 13 tarik u Naitung, la pynlong biang ïa ka jingjurip, bad la lap ba katei ka dukan ka la kohnguh bad bud ïa ki kyndon haduh 98 per cent, hynrei ïa ka license ym shym la pynphai biang.
Nangta ki trai dukan ki la aiti ïa ka jingkynthoh sha ka FDA ban pan weng noh ïa ka hukum pynsangeh, hynrei ym shym la leh eiei, hadien kata ki la leit sha ka ïingbishar bahakhliehduh.
U Mundhe u la ong ba un sa bishar bniah ïa ka hukum shwa ban jubab.”Nga hap ban peit ïa ka hukum, nangta ngan sa jubab.
Ka FDA kan leh katkum ka aiñ bad ki rukom treikam ba la buh. Ngi ïaid katkum ka aiñ, katkum ki rukom treikam, ngi bud ïa ka, bad ngi pyntreikam ïa ka,” u la bynrap.
