Bhopal, Nailar:
Na kaei kaba la sdang kum ka jingpynshisha ba man ka por jong ki pulit sha ka jingthoh ha ka Instagram kaba pyni ïa ka pistol ka la pynlong ban ïoh kurup kynsan ïa ka pisa kaba jan T.3 klur kaba khlem buh jingkheiñ na ka ïing jong uwei u nongñiah taksi bad Autorickshaw ha ka distrik Sagar jong ka Madhya Pradesh.
Ïa kane ka pisa la kurup na ka thaiñ Tili Tigadda kaba hap hapoh Gopalganj police station ha ka janmiet jong ka sngi U Blei ha ka por ba ki pulit ki dang ïaid ban ithuh ïa ki Social Media Account kiba la pyni ïa ki dur bad ki video jong ki briew kiba pyni dur bad ki tiar siat, ki wait bad kiwei kiwei ki tiar ïaleh.
Katkum ka tyllong khubor na ki pulit jong ka Sagar distrik, ki pulit ki ju buddien man ka por ïa ki Social Media Profile jong ki briew kiba suba don ki kam runar lane kiba pyni ïa ki tiar ïaleh online.
Ha ka jingïalehkai ha ka sngi U Blei, ki ophisar ki la lap ïa ar tylli ki profile ha ka Instagram kiba don ïa ki dur jong ki suloi.
Hadien kata la pynlong ïa ka jingpynshisha ha ki ar tylli ki khep ba kyrpang, kawei ha ka jaka jong ka thanat Moti Nagar bad kawei pat ha Gopalganj.
Kane ka jingjia ha Gopalganj ka la ïalam ïa ki pulit sha ka ïingsah jong u Saurabh Ahirwar. Ki ophisar ki la leit shata ban kylli jingkylli ïa u shaphang ka pistol kaba la ïohi ha ka dur bad ban wad ïa katei ka suloi. Hynrei ym shym la lap ïa kano kano ka pistol ha katei ka ïing.
Ha ka jingtalasi, ki pulit ki la ïohi ïa kawei ka almari kaba la khang. Haba la bthah ïa ki bahaïing ban plie, la kynnoh ba ki la ong ba kim don ïa u shabi. Hadien ba la pyndep ïa ki jingdonkam bad pynkhreh ïa ka panchnama, ki pulit ki la plie ïa ka almari ha ka jingdon lang ki nongsakhi.
Hapoh, ki la lap ïa ki pla kiba don ki song pisa. Ka jingbun jong ka pisa ka long kaba heh bha haduh ba ki pulit ki la lah ban wanrah ïa ka mashin kheiñ pisa. Hadien kata la kurup ïa ka pisa hapoh ka jingshondur bad ha ka jingdon lang ki sakhi ba laitluid.
“Ïa kane ka almari la plie ha ka jingdon lang ki bahaïing bad ki sakhi hadien ba la bud ryntih ïa ki rukom treikam ba la bthah, hapoh la lap ïa kawei ka pla kaba thep shibun ki pisa” ong u Superintendent of Police ka Sagar distrik u Anurag Sujania.
Ki pulit ki la ong ba ka jingkheiñ ka pyni ba ka pisa ba la ïoh kurup ka la jan poi sha ka 3 klur tyngka.
Kane ka jingïoh kurup mynta ka la pynlong ïa ka jingtohkit halor ka jinglong trai bad ka tynrai jong kane ka pisa.
Ki pulit, ki ïathuh ba u Saurabh Ahirwar, u trei kum u nongñiah taksi, katba u hynmen jong u, u ñiah ïa ka kali lai shaka. Ki hynmen ki la ïathuh ha ki nongtohkit ba katei ka pisa kam dei ka jong ki.
Ki la kam ba ka dei jong uwei uba haïing hasem, u Ramesh Ahirwar, uba la kynnoh ba u la buh ïa katei ka pisa ha almari 8 haduh 9 bnai mynshwa.
Kitei ki longïing ki la kam ruh ba u Ramesh u sah ha Bhopal bad u trei kum u Engineer bad ka tnad Public Works. Ki pulit ki la ïathuh ba ïa kine ki jingkynnoh, bad kumjuh ruh ïa ka tyllong jong ka pisa, la pynshisha da kaba laitluid.
Ka jingpynngat ha ki kyndon aiñ kaba kham bniah kan shong ha ka jingmih jong ka jingtohkit.
