Aizawl, Kyllalyngkot:
Ki la don kumba 71 ngut ki briew, ba kynthup ïa 11 ngut ki kynthei, ki la ïap na ka daw ka jingdih drok ha Mizoram ha u snem 2024, ong ka tnat Excise and Narcotics.
Ka jingïap ka long kaba duna khyndiat ban ïa kaba la ïathuh ha u snem 2023. Baroh ki don 74 ngut kiba la ïap namar ka jingdih drok ha katei ka snem, la ong ka khubor.
“Kiba bun na ki, ki ïap namar ka jingdih drok Heroin”, la ong u nongaiktien jong katei ka tnad, u Peter Zohmingthanga. Naduh u snem 1984, ha kaba la ïathuh ba nyng-kong eh ïa ka jingïap na ka daw jong u drok ki la don haduh 1,881 ngut ki briew, kynthup ïa 230 ngut ki kynthei, ki la ïap na ka daw jong u drok ha ka jylla, katkum ka jingkheiñ jong ka sorkar.
Ka Mizoram, kaba la khang ïa ka kyiad, ka la ïaleh pyrshah ïa ka jingshalan tuh ïa u drok na Myanmar. Kane ka jylla barit ka ïasam ïa u pud u sam uba jrong 828 km bad ka Myanmar bad ka Bangladesh. U Spasmo-Proxyvon bad u Parvon Spas ki dei ki dawai pynïap briew kiba kham bna haduh u snem 2015, hadien kane u drok Heroin u la kham paw namar ka jingkiew ka jingpynpoi jong u na Myanmar, ong ki heh sorkar.
Ka jingïap kaba bun tam na ka jingdih drok ka long ha u snem 2004 ha kaba 143 ngut ki briew ki la ïap. Ha kine ki 10 snem ba la dep, ki don 564 ngut ki briew kiba la shah pynïap namar ka jingdih drok ha ka jylla, la pyni ka jingkheiñ jingdiah.
Ka tnad Excise ka la kurup 46.5 kg u drok Heroin, 138.8 kg ki dawai pynbuaid, bad 586.6 kg u Ganja, nalor kiwei pat ki tiar, ha u snem 2024. Ka la mudui mukotduma pyrshah ïa ki 7,309 ngut ki briew ha ki kam runar ba ïadei bad u drok bad kyiad ha u snem ba la dep.
