New Delhi, Kyllalyngkot:
U Arvind Kejriwal, tuba long u nongai jingmut jong ka seng Aam Aadmi Party (AAP) ha kine ki khyndiat sngi ba la leit, u la pynbna ba ki samla pule shynrang kiba pule ha ki skul bad ki kolej, kin ïoh ïa ka lad ka kabu lada ki shong bos ha kaba kim donkam siew bad ka jingpynlait ba 50 percent ïa ka bai Metro, lada ka sorkar AAP, ka wan biang ha ka bor synshar ha Delhi.
“Ka sorkar Aam Aadmi Party ka ai jingmut kaba khraw tam ïa ka jingpule. Kiba duk ki duh ïa ka jingpule namar ba kim don pisa. Lada thaw biang ïa ka sorkar jong ngi, yn pynbiang sha ki samla pule ïa ka bos khlem jingsiew. Ka long khlem jingsiew iïa ki samla pule kynthei mynta bad ngin pynlong laitluid ïa ki khynnah shynrang ruh,” la ong u Arvind Kejriwal.
Kaba kham pawnam, na ka bynta mynta ka Delhi ka don ïa ka jingshakri jong ki bos khlem donkam siew kaba ailad ïa ki kynthei ban ïaid khlem jingsiew bai kali ha baroh ki bos AC bad ki bym don AC ba pynïaid da ka Delhi Transport Corporation.
Haba kdew shuh shuh shaphang ka shithi jong u sha u Myntri Rangbahduh ka ri u Narendra Modi uba tyrwa ba dei ban ai jingbit 50 percent ïa ki samla pule kiba leit jingleit ha Delhi Metro u Kejriwal u la ong, “Ka jingbun ki samla pule ki pyndonkam ïa ka Metro ha Delhi, kaba la kylla long kaba remdor. U samla pule uba wan na ka longing baduk u ïakynduh shibun ki jingeh Lada u pyndonkam da ka …Ka Metro ka dei ka jingthmu 50-50 jong ka sorkar Delhi bad ka sorkar kmie…nga la thoh shithi sha u Myntri Rangbahduh ba dei ban ai jingpynhiar dor 50 percent ïa ki samla pule ha ka tiket Metro.”
“Ka jinglut ka ban wan hadien ba la ai ïa ka jingbit, ïa kata ka jinglut yn sa ïasam 50-50 hapdeng ka sorkar Delhi bad ka sorkar kmie. Kane ka dei ka mat kaba donkam ïa ki paidbah, kam don satia kano kano ka kam saiñ pyrthei ha ka. Nga kyrmen ba u Myntri Rangbahduh un pdiang ïa kane …Hadien ka ilekshon, ka jingleit jingwan jong baroh ki samla pule ha ki bos jong ka Delhi kan long kaba laitluid. Ngin ai ka jingpynlait kaba 50% ha ka bai Metro na ka bynta baroh ki samla pule jong ka Delhi…,” u la bynrap.
U Kejriwal u la ong ba ki samla pule ha Delhi ki shaniah ha ka Metro na ka bynta ka leit ka wan sha ki skul bad ki kolej bad kumta, dei ban pynduna ïa ka jingkit pisa ha ki.
“Nga thoh ïa kane ka shithi ban pynleit jingmut ïa phi sha kawei ka mat kaba kongsan kaba ïadei bad ki samla pule skul bad kolej jong ka Delhi. Ki samla pule jong ka Delhi ki shaniah shibun ha ka Metro ban leit sha skul ne kolej jong ki,” la thoh ha ka shithi.
