New Delhi, Kyllalyngkot:
Ka Myntri Rangbah jong ka Delhi, ka Atishi, ka la pynrem jur ïa ka jingweng noh ïa ki bor pahara jong ki pulit ka Punjab, na ka bynta ban ai jingïada ïa u nongai jingmut bad nongaibuit-aibor jong ka seng Aam Aadmi Party (AAP), u Arvind Kejriwal, da kaba kynnoh ïa u Myntri Rangbahduh ka ri, u Narendra Modi bad ïa u Amit Shah, uba long u Myntri ka sorkar kmie bad khmih ïa ka tnat kam pohïing, ba ki ‘ïalehkai bad ka jingim jong u Myntri Rangbah barim ka Delhi.
Kane ka nongïalam jong ka AAP, ka la kynthoh pyrshah ïa ka seng Bharatiya Janata Party (BJP) bad ka la buh jingkylli ruh ïa ka Election Commission (EC), namar ba ka dei ka “nongpeitkai kaba khlem kren” wat hapdeng ka jingshah thombor kaba la long da bunsien” ïa u nongïalam jong ka seng ha ka ri.
“Ka dei ka jing-lehraiñ kaba haduh katta katta. Halor ka jingbthah jong u Amit Shah, ki pulit jong ka nongbah Delhi mynta ka sngi ki la weng jubor ïa ki pulit ka Punjab kiba dei ban ai pahara na ka bynta u Arvind Kejriwal. Bad ha kane ka juh ka sngi, u Kejriwal u la shah thombor ha ki runar jong ka seng BJP ha Hari Nagar” ong ka Atishi ha ka jingthoh ba ka la phah ha ka rynsan X.
Ha ka step jong ka sngi Palei, u Kejriwal u la kynnoh ïa u Shah ba u la thmu ban pynthut ïa ka jingïalang paidbah jong u ha Hari Nagar ha Delhi. U Myntri Rangbah barim u la kynnoh ba ki pulit ka Delhi ki la ailad ruh ïa ki nongkyrshan jong ka liang pyrshah ban thombor ïa ka kali jong u, “kane baroh ka la long katkum ka jingbthah jong u Amit Shah.”
“Hato u Modi bad u Shah ki kwah ban ïalehkai bad ka jingim jong u Kejriwal? Haduh katno ka Election Commission kan dang lah ban long kum ka nongpeitkai kaba khlem kren ei ei? Balei ka don ka jingsngap jar halor ki jingshah thombor ba man ka por ïa u nongïalam jong kane ka seng ha ka ri?” la ong ka Atishi ha ka jingthoh ba la phah ha ka rynsan X.
Kane ka jingkren jong ka Atishi ka long hadien ba ki pulit ka Punjab ki la weng noh ïa ka jingpahara ïa u Kejriwal. U heh pulit jong ka Punjab, u Gaurav Yadav, u la ïathuh ba hadien ka jingbthah na ka EC jong ka ri India bad ki pulit jong ka Delhi, la weng noh ïa ki kynhun jong ki pulit jong ka Punjab, kiba la buh na ka bynta ban ai jingïada ïa u Arvind Kejriwal.
U Parvesh Verma, uba long u nongïalam ka seng BJP, u la ong ba ka jingkynnoh, halor ka jingpynshisha ba ka la don ka jingthombor ïa ka kali jong u Kejriwal, ha Hari Nagar, ka long kum ka drama. “Arvind Kejriwal shen ngin sa wanrah ïa ka drama ‘Hamla hua’ (ka jingthombor kaba jia shisha), nangta yn shon ha ki Poster – ‘Mujhe Kyon Mara?’ Ka ilekshon ka la jan, u Bhai Saheb u dang thoh ïa ka khana,” la ong u Verma uba ïakhun pyrshah ïa u Kejriwal na New Delhi konstitwensi, ha ka rynsan X.
