Thiruvananthapuram:
U Myntri Rangbah ka jylla Kerala u VD Satheesan u la pynbna ha ka jingïalang bad ki lad pathai khubor hadien ka Cabinet hangne ha ka sngi Balang ba ki bahaïing jong kiba la duhnoh ïala kajong ka jingim kin ïoh T.8 lak, katba ki longïing kiba shah ktah kin ïoh T.10 hajar na ka bynta ka jingïarap mardor ryngkat bad ka bai bam kaba T.300 man ka sngi.
Hadien ka jingmih ki jingjia ba sngewsih kiba ïadei bad u slap, ka sorkar jylla ka la pynbna ïa ka jingïarap na ka bynta ki lanot shlei um.
Ïa ka jingïarap ban tei pat ïa ki ïing kiba la shah pynjot pura la pynkiew sha ka T.6 lak, bad yn ai T.12 lak na ka bynta kito kiba la duh ïa ka ïing bad ka jaka.
Ka jingsiew bai lutksan na ka bynta ka jingduhnong jong ki jingthung la pynkiew da 25%. “Ha kaba nyngkong, ki trai dukan kiba la mad ïa ka jingduhnong kin ïoh ïa ka jingïarap kaba T.10,000 bad yn pyntreikam ïa ka skhim Soft Loan na ka bynta ki MSME kiba shah ktah,” ong u Myntri Rangbah ka Jylla.
Ka sorkar jylla kan pynkup burom ïa u R Rajesh, u nongpyllait im uba na, Thiruvananthapuram, uba la ngam ha Cherupuzha, Kannur, katba u dang pyllait im ïa u nongrep uba sahkut lynti, da ka jingpynkup burom jong ka sorkar jylla.
U Satheesan u la ong ba ka sorkar kan bei pisa ruh pura ban pyndep ïa ka ïing jong u.
Nalor kata, la mynjur ïa ka jingïarap pisa na ka Chief Minister’s Distress Relief Fund na ka bynta ki 248 ngut kiba dang sah ha ka jingshlei um bad jingtwa khyndew ha ka distrik Thrissur kiba la duh noh ïa ki ïing ki sem jong ki ha u snem 2024.
Halor ki jingjia ba sngewsih ba ïadei bad u slap, u Satheesan u la ong ba haduh mynta ki la don 26 ngut kiba ïap bad 11 ngut ki la mynsaw katba saw ngut kiwei pat ki dang jah rngai.
“Nalor kata, la ïathuh ba ka jingjulor ki jingthung ka la jia ha kylleng 1,882 hektar.Katkum ka jingkheiñ ba nyngkong, ka jingduhnong kaba nyngkong ka la jia haduh T.67.44 klur.Ka jingjulor ki jingthung ka la jia ha kylleng ki jaka kiba 1,882 hektar bad ka la ktah ïa ki 23,537 ngut ki nongrep,” ong u Sathesane.
Ka sorkar jylla ka la pynbna ruh ïa ki jingthmu ban pynduna ïa ka jingshlei um kaba neh slem kaba pynshong nongrim ha ka AI-driven Disaster Management Resilience Programme.
U Myntri Rangbah ka jylla u la ong ba ki jingthmu ba kongsan ki kynthup ïa ka jingpynbha ïa ki rukom tip ïa ka jinglong ka suiñbneng, ka jingshna ïa ka map jong ka jingshlei um ha kylleng ki jaka ba lah ban shah ktah, bad ka jingpynkhuid ïa ki wah bad ki dam kiba heh.
Yn pynsted ïa ki skhim ïada ïa ki rud duriaw, da kaba pyndonkam ïa ki geo-bag ha ki jaka ba lah ban shah pynjot. Nalor kata, ka sorkar kan pynkylla ïa ka skhim shna ïing ha Punargheham na ka bynta ki nongtong dohkha ban weng ïa ki jingeh kiba la slem bad ban pynbha ïa ka jingïarap pisa baroh kawei.
