Randhi, Nailar:
Ranchi: Ka jingïakhih jong ki samla pule ka Jharkhand pyrshah ïa ki jingkynnoh ba ki don ki jingleh be-aiñ ha ki eksamin thungkam jong ka jylla, kaba la sdang naduh 12 sngi shwa, ka la nangjur ha kaba ka jingïakhih kaba heh bha ha kaba da ki spah ngut ki la ïasnohkti lang ha ka jingïakhih ha Jaipal Singh Munda Stadium ha ka nongbah Ranchi.
Kine ki jingïakhih ki la sdang hadien ba la pynbna ïa ka result jong ka eksamin ba nyngkong jong ka 14th Jharkhand Public Service Commission (JPSC) ha ka 5 tarik u Naitung, ha kaba ki nongthep kam ki la kynnoh ba ki don ki jingbym ïaid beit ha ka rukom thungkam. Naduh katei ka por, ki samla pule ki la pynlong ïa ki jingïakhih baroh shisngi bad ka jingïakhih kaba khlem buh pur, da kaba dawa ïa ka jinglong kaba shai bad ka jingkitkhlieh.
Ka jingïakhih kaba nang jur ka la pynbor khatduh ïa ka sorkar jylla ban sdang ïa ka jingïakren bad ki samla pule kiba pynlong ïa ka jingïakhih.
Ha ka sngi Balang, u Ophisar jong ka Ranchi Sub-Divisional (SDO) u Kumar Rajat u la leit jngoh ïa ka jaka pynlong jingïakhih bad pynsngew ïa ka jingkwah jong ka sorkar ban pynlong ïa ka jingïakren bad ki samla pule kiba pynlong ïa ka jingïakhih. U la kyrpad ïa ki nongïakhih ban tyrwa ïa ka kynhun kaba don san haduh hynñiew ngut ki nongmihkhmat, da kaba pynthikna ba ka sorkar ka long kaba la pynkhreh ban ïakren ïa man la ka mat bad ban trei ban ïoh ïa ka jingpynbeit lyngba ka jingïakren.
Ka sorkar u Hemant Soren ka la thaw ïa ka komiti kaba kynthup ïa ki Myntri bad ki ophisar ban ïakren bad ki samla pule. U Rajat u la pynpaw ba ki jingujor ha kaba ïadei bad ki jingbym ïahap ha ka eksamin thung kam ki la don lypa hapoh ka jingtohkit bad ba ki tnad ba dei peit ki dang trei kyrkieh.
Hynrei ki samla pule ki la kyntait ïa ka jingtyrwa ban ïakren bad ki la kren shai ba kin mynjur ban ïakren tang lada ïa ka rukom treikam la pynlong da kaba shai bad hakhmat ki paidbah.
Ki la ban jur ba kano kano ka jingïakren bad ka sorkar ka dei ban long hakhmat ki lad pathai khubor bad ki camera.
