Bengaluru, Nailar:
Ki la don kumba 22 ngut ki nongsynshar jong ka seng Congress jong ka Gadag-Betageri Municipal Council kiba la iehnoh kam da ka jingpyrshah ïa ka jingshah kyntait jong u nongïalam ba rangbah jong ka seng bad u MLA ka Gadag u HK Patil na ka kynhun Myntri ba la pynïar jong ka Karnataka. Ki la pynlong ruh ïa ka jingïakhih habar jong ka Ophis jong ka Gadag DC’s bad aiti ruh ïa ka jingiehnohkam sha u DC ka Gadag u CN Sridhar.
Ki la dawa ruh ban ïoh jylla kyrpang ïa ka North Karnataka. Na ki 22 ngut ki dkhot kiba la iehnoh kam, 17 ngut ki dei kiba la jied na ka Congress bad kiba sah pat ki dei ki Nominated Members.
“U Myntri barim u HK Patil u la noh synñiang haduh katta katta ha ka roi ka par jong ka jylla uba la long MLC saw sien, MLA lai sien bad Myntri. Ka la don ka jingbishar bymhok ïa u,” la ong u Councillor jong ka seng Congress.
U nongkyrshan jong u Myntri barim bad u MLA ka Gadag u H K Patil u la smai ha ka sngi Balang ba un ym phong jaiñ haduh ban da pynlong Myntri ïa une u MLA.
U Rachappa Gadad u la ong ba u la sngewsih hadien ba ka kyrteng jong u Patil ka la jah noh na ka thup ba khatduh jong ki myntri ba la pynmih da ka kynhun bahalor jong ka seng Congress ha ka lah sngi U Blei. U Rachappa u la weng noh ïa ka sopti jong u ha ka Ophis jong u DC’s ha ka sngi Ba-ar bad u la shim ïa ka jingsmai.
Da ki spah ngut ki nongkyrshan jong u MLA ka Shantinagar Congress, u NA Haris, ki la pynlong ïa ka jingïakhih ha War Memorial kaba don ha Brigade Road ha Bengaluru ha ka sngi Ba-ar, ha kaba ki la dawa ba dei ban pynrung ïa u ha ka kynhun Myntri jong ka Karnataka. Katba ki nongïakhih ki dang pyrshang ban khang lynti, ki pulit jong ka Ashok Nagar ki la shim mardor ïa kumba 20 ngut ki nongïakhih sha ka jingshah set phatok.
Ki nongkyrshan ki la ïalum lang hakhmat ka War Memorial ha ka por kumba 10 baje mynstep ha ka sngi Ba-ar, da kaba deng ïa ki jingdeng rong ïong ha ka shyllang bad ha ki kti jong ki. Ki la pynïeng ïa ki placard bad ki dur jong utei u MLA bad ki la pyrta da ki kyntien ban dawa ban pynlong Myntri ïa u.
Ka jingbym sngewhun hapoh ka seng Congress ka la jur hadien ba u MLA ka T Narasipur u HC Mahadevappa u la shah kyntait ban ïoh shong ha ka kynhun Myntri ba dang shu pynïar thymmai jong ka Karnataka.
Ki nongïalam ka Congress bad ki nongkitkam jong ka T Narasipur Assembly konstitwensi ki la aiti ïa ka jingiehnohkam paidbah jong ki, da kaba pynpaw ïa ka jingbitar halor kaei kaba ki khot ka jingleh bymhok ïa u nongïalam jong ki. Ïa ki shithi iehnoh kam la phah sha u President ka Mysuru Rural District Congress u Vijay Kumar.
Ki nongïalam ki la kynnoh ba u Mahadevappa, u nongïalam ba rangbah jong ki Dalit bad u rangbah ba ïaineh ha ka seng, u la shah iehbeiñ khlem akor ha ka por ba pynïar ïa ka kynhun Myntri watla u la noh synñiang la slem bha sha ka seng.
