New Delhi, Nailar:
Ka sorkar pdeng ka la pyntip sha ka Supreme Court ba ka dang pyrkhat ban pynkylla thymmai ïa ka National Eligibility-cum-Entrance Test na ka bynta ki jingpule Undergraduate (NEET-UG), kynthup ïa ka jinglah ban pynrung ïa ka eksamin kaba ar kyrdan, kaba pynshong nongrim ha ka kor Computer kum shi bynta jong ki jingpynkylla kiba kham ïar ha ka rukom rung doktor ha India.
Ha ka Affidavit ba la mudui hakhmat ka ïingbishar ba hakhlieh duh, ka sorkar pdeng ka la ong ba ka dang wad ïa ka lad ban pynlong ïa ka NEET-UG ha ki ar tylli ki kyrdan ba pyndonkam da ki kor Computer, ha ki laiñ jong ka Joint Entrance Examination (JEE). Hynrei ka la pynshai ba ym pat shim ïa ka rai kaba khatduh bad ba ïa kino kino ki jingkylla ha ka rukom leh eksamin yn pyntreikam tang hadien ka jingïamir jingmut kaba bniah bad ka jingai jingmut jong ki riew shemphang.
Mynta, ïa ka NEET-UG la pynlong ha ka rukom kaba khlem da pyndonkam thoh da u khulom bad ka kot, khamtam eh ban pyndap ïa ka jingbun ki nongthoh eksam kiba wan sha ka eksamin ha kylleng ka ri. Ka jingkylla sha ka rukom treikam kaba pyndonkam da ka Computer, kaba don bun ki kyrdan kan pyni ïa kawei na ki jingkylla kaba kongsan tam ha ka eksamin rung doktor ha kine ki snem ba la leit noh.
Ka sorkar pdeng ka la pyntip sha ka ïingbishar ba kino kino ki jingpynkylla kiba la tyrwa kin long katkum ki jingai jingmut jong ka kynhun treikam ba heh bor ba la khlieh da u Nandan Nilekani, ïa kaba la thaw ban bishar bniah bad pynkhlaiñ ïa ka rukom thoh eksamin.
Ka la pynthikna ruh ba yn ai jingtip kaba biang ïa ki samla pule bad ka por pynkhreh shwa ban pyntreikam ïa kano kano ka rukom ba la pynkylla.
Ka affidavit ka la batai ïa ki lad ki lynti kiba la dep ban pyntreikam ban pynbha ïa ka jingshngaiñ bad jingshai jong ki eksamin NEET.
Kine ki kynthup ïa ka jingpynkhreh ïa ki kot jingkylli kiba bun jait, ka jingpeitngor kaba pyrkhing bha ha ka por ba shon bad kit, ka jingsong ïa ki tiar ba lah ban pynthut da ki tiar pynïada, ka jingpeitngor da ki CCTV ha ki jaka eksamin, ka jingpynshisha ïa ki kyrtong da ka biometric, ka jingbuddien da ka QR code ïa ki tiar eksamin ba rieh, bad ka jingpynkylla hapoh ka National Testing Agency (NTA).
Ki jingthmu ban pynkylla ki wan hadien ka jingsngewkhia halor ka jingpynïaid ïa ki eksamin NEET ba dang shen, kaba la pynlong ïa ka ïingbishar bahakhlieh duh ban pan ïa ka jubab jong ka sorkar pdeng halor ki lad ki lynti kiba jrong por ban ïada ïa ka jinglong ba janai jong ka rukom leh eksamin.
Ka sorkar ka la ïathuh ha ka ïingbishar ba ka dang pynlong ïa ka jingbishar bniah ïa ka rukom leh eksamin ban pynkhlaiñ ïa ka jinglong hok, ka jingshai bad ka jingshaniah jong ki paidbah katba dang ïada na ki jingbym ïahap hadien habud.
Ka la pynpaw biang ba baroh ki rai ha kaba ïadei bad ki jingpynkylla ba la tyrwa yn shim hadien ba la bishar bniah bha, ha kaba ka jingmyntoi jong ki samla pule kan sah kum ka jingthmu ba kongsan.
