Guwahati, Kyllalyngkot:
Kumba la sakhi la ong ba la pynkhlaiñ ïa ka jingpahara ha Dibrugarh jong ka Assam ha shwa ban rakhe ïa ka Republic Day. Baroh ki kynhun pahara ki long kiba la pynkhreh bad ki dang khmih bniah ïa kawei pa kawei ka kam na ka bynta ka jingrakhe ïa ka sngi Republic Day kaba ïaid beit ïaid ryntih bad kaba suk.
U Superintendent of Police ka Dibrugarh u Rakesh Reddy u la ong, “Ngi la pynkhreh pura na ka bynta ka jingrakhe ïa ka Republic Day. Ka jingpahara ha ka por mynmiet bad ka jingkhmih bniah kaba 24 kynta ha ki Naka ka la ïaid shakhmat ha ki jaka rung jaka mih jong ka Dibrugarh distrik. Ban pynthut ïa kino kino ki jait jingjia, ka kynhun pulit jong ngi bad baroh ki bor pahara bad ki tnad pahara ki dang trei,”.
“La pynkhlaiñ bha ïa ka jingpahara ha Joypur bad ka thaiñ Bordoubi kaba dei ka thaiñ khappud jong ka Dibrugarh distrik na kaba ki lehnoh ki lah ban rung tuh. Ngi la khang ïa ki hynriew tylli ki thaiñ jong ka Dibrugarh na ka bynta ka jingshngaiñ. Ka jingpyrkhing ha kine ki thaiñ ka dang ïaid shakhmat”, la ong u Reddy.
Ha kajuh ka por, ki pulit ki dang pynkynriah ruh ïa ki kali ba la don ba ieh na ki surok, ki surok bah, ki jaka ïeng bos, bad ki ïew ki hat. Kane ka jingkhynra ka wan hadien ka jingjia ha ka sngi lait-luid jong u snem ba la lah ha kaba ka kynhun lehnoh Ulfa-I kaba la shah ñiew beaiñ ka la tep ïa bun tylli ki bom Improvised Explosive Devices (IED), kiba kham bun ha ki kali ba la iehnoh ha kylleng ka jylla.
“Ngi la pynkynriah ryntih ïa ki kali ba la iehnoh bad ki bym pat don ba kam na ki surok, ki surok bah, hajan ki jaka ïeng kali, bad ki jaka ïew ha kine ki lai sngi ba la dep ban pynduna ïa kino kino ki jingma kiba lah ban mih kum shi bynta ban shim ïa ki lad jingïada. Ngi dang pynlong ruh ïa ki jingkhynra ba pyrkhing pyrshah ïa ka jingpynjot, da ki ksew sma dien ban pynsuk ïa ka jingkhynra jong ngi,” ong u SP ka Dibrugarh.
U la ong shuh shuh, “Ka jingkhynra shaman ki thliew ïing ka la ïaid shakhmat ha ka jingjngai kaba 4km jong ka madan parade Khanikar. Ngi dang shim ïa ki lad ki lynti na ka bynta ban pynsuk ïa ka jing-rakhe ïa ka Republic Day ha Dibrugarh,”.
U Myntri Rangbah ka jylla Assam u Himanta Biswa Sarma ha ka sien ba nyngkong un pynher ïa ka lama ka ri ha madan ïalehkai Khanikar ha Dibrugarh ha ka sngi ban rakhe ïa ka Republic Day.
