Kynthoh jur u Modi ïa ka rukom synshar jong ka sorkar AAP ha Delhi

U Modi, ha ka jingïakren Online bad ki dkhot jong ka Delhi BJP, u la ong ba ka AAP, kaba u la khot "aapda (jingjulor)," ka la paw pyrthei.

New Delhi, Kyllalyngkot:

U Myntri Rangbahduh ka ri, u Narendra Modi, u la kyntu ïa ki dkhot ka Delhi Bharatiya Janata Party (BJP) ba kin thong ban jop palat ïa ka 50 per cent ki booth ha ki ilekshon Assembly bad u la ong ba ki briew ki pynpaw pyrthei ïa ka jingbitar ïa ka sorkar Aam Aadmi Party (AAP) bad ki dang pynkynmaw ïa ka halor ki jingkular, la ïathuh ki lad pathai khubor.

U Modi, ha ka jingïakren Online bad ki dkhot jong ka Delhi BJP, u la ong ba ka AAP, kaba u la khot “aapda (jingjulor),” ka la paw pyrthei.

Ka aapda ka pynmih ïa ki jingpynbna thymmai man ka sngi namar ba man ka sngi ka ïoh jingtip ïa ka jingduh jaka ha ki bynta bapher bapher jong ka Delhi, u la ong.

U Modi u la kynnoh ba ka AAP ka la thmu ban beh ïa ki briew na ‘purvanchal’ na ka nongbah jong ka ri, da kaba kynnoh ba ka seng ka dap da ka jingshun pyrshah ïa ki.

U la bynrap ba ka AAP ka la leh ïa ki kam thok bad shukor katba ka Congress ka la shet kylla ïa ki briew ha kine ki 25 snem ba la leit.

Kito kiba kha ha kine ki 25 snem ba la leit ne kiba don ha ka rta 35-40 snem kim shym la ïohi ei ei hynrei tang ka jingpynthut, u la ong bad bynrap ba ki la duh jingkyrmen bad ki don ha ka jingduh jingkyrmen.

Katkum ka jingïathuh ki lad pathai khubor, u Myntri Rangbahduh u la ong ruh ba ka jingpynliem ïa ka AAP ba la ïalam da u Arvind Kejriwal kan plie lad ban pynurlong ïa ka jingkut jingmut ban pynlong ïa ka Delhi kum ka nongbah ba la kiew jong ka ri India ba la kiew.

Haba kynthoh ïa ka AAP namar ba kam lah ban pynbiang ïa ki jingdonkam bakongsan kum ka um sha ki briew, u Modi u la ong “ka kyiad ka don hynrei ka um kam don”, haba ïakynduh bad uwei u dkhot ka BJP.

U Modi u la ong ba ka BJP kan pynlong ïa ka jingïalap kaba jur bha ban pynthikna ba ka um dih kan poi sha baroh shisien ba ka la jied ban synshar hangne, la ïathuh ka tyllong khubor.

“Ka ‘aapda’ kam shym la pyndep ïa kano kano ka jingkitkhlieh jong ka,” u la ong, da kaba kyrpad ïa ki dkhot jong ka BJP ban rah ïa ki video bad ki dur jong ki surok kiba sniew, ki jinglong jingman jong ki nala um bad ki jaboh jabaiñ, nalor kiwei pat ki jingeh kiba ki briew ki ïakynduh, ban “pynpaw pyrthei” ïa ka AAP.

U la pynpaw ruh ba ka sorkar Delhi ka dei kaba la pynlong ïa ka jingkiew jong ka bai bording jong ki briew.

Haba ther tyngeh ia u Kejriwal, u la ong ba ka “Sheeshmahal” ka dei ka nuksa kaba im jong ka jingleh arsap bad thok jong ka AAP.

Ka BJP, ka la ai kyrteng ïa ka jaka sah jong u Kejriwal, kum ka Sheeshmahal, da kaba kam ba u la pynlut da ki klur ha katei ka ïing, ong ka tyllong khubor.

U Modi u la kyntu ruh ïa ki dkhot ka BJP ban pynthikna ïa ka jingthep vote kaba sah kynmaw ha ka ilekshon Assembly sha Delhi jong u snem 2025.

Khlem da jer kyrteng ïa u Kejriwal, u la ong ba u Myntri Rangbah barim u la bakla ban pynkhuid ïa ka wah Yamuna namar ba u ngeit ba ka jingpynkhuid ïa ka wah Yamuna kam ïoh vote.

U Myntri Rangbahduh u la ong ba ka AAP ruh kam shym la lah ban pyndep ïa ka jingkular jong ka ban tei ïa ki ïing na ka bynta ki baduk, bad u la kdew ba ka sorkar kmie ka la tei da ki hajar tylli ki ïing na ka bynta jong ki.

U la kynnoh shuh shuh ba ka AAP ka pynbna tang da ki jingpynbna thok bad kular ba ka BJP kan pynbha ïa ka jinglong jingman jong ki skul sorkar ha ka nongbah jong ka ri.

Ka BJP kan sa ïoh ïa ka jingjop kaba khraw ha ka ilekshon Assembly jong ka Delhi ha une u snem halor ka jingkhlaiñ jong ki nongtrei ki Booth jong ka, u la ong da kaba pynskhem ba ki briew khamtam ki kynthei ki ïalam ïa ka jingïalap paidbah jong ka.

Haba ther ïa ka Congress, u Modi u la ong ba ka seng ka ju ai jingkular lamler hynrei ka AAP ka la tam bha ïa ka seng pyrshah ba kongsan ha kaba leh kumta.

U la ong ba ka rukom treikam jong ka BJP ka dei kaba la pynshong nongrim ha ka jingshisha bad ki sorkar jylla jong ka ha Haryana, Maharashtra bad Odisha, nalor kiwei, ki la pyndep ïa ki jingkular jong ki, kynthup ban pyllait ïa ka jingïarap pisa sha ki kynthei.

Ka la shim por palat hynñiew phew snem ba ki jingpang bapher bapher kin roi ha ka Congress, hynrei ka AAP ka la pynïahap ïa ka ha ki hynriew bnai bad ka la tam ïa ka ha ki hynñiew snem ban wan, u la bynrap, ong ka khubor.

Haba pynpaw ïa ka jingshimkhia jong ka BJP ïa ki briew kiba pdeng bad ban pynbha ïa ka jingsuk ha ka jingim, u Myntri Rangbahduh u la ong ba ka sorkar kmie ka la pynlut ïa ka pisa kaba heh bha na ka bynta kane, kynthup da kaba shna ïa ki Metro bad ki surok bah.

Ban pynthikna ba ki briew kiba pdeng kin ïoh ïa ka jingim kaba suk, ka sorkar ka pynlut ïa ka pisa kaba heh bha.

“Ngi la jubab ïa ki jingangnud jong ki kynhun bapdeng ha Delhi,” u la bynrap.

U Myntri Rangbahduh u la kdew ruh ba da ki lak tylli ki longïing ha Delhi ki don bad ki nongtrei sorkar kmie bad kiba ïoh penshon, bad pynskhem ba ka 8th pay Commission kan pynkylla ïa ka jinglong jong ki, ong ka tyllong khubor.