Raphael Warjri
Dei tang u bnai u ba mih bad ngen katkum ka ïa ba la buh hi da ka jylli jong ka por. Manla ka khep ba mih bnai ka ju long barabor khatsaw sngi ba pyllun bnai bad hadien khatsaw sngi biang ba ngen bad dum bnai shwa ban mih pat da uwei u bnai ba bud. Kumta ka rukom kheiñ sngi kheiñ ïa ka long ryntih hi na u bnai manla ba mih ba pyllun bad ba ngen haduh ynda dum bnai bad mih biang ha ka sngi kaba bud da kawei pat ka ïa ban kheiñ ïa ki aïom ha ka shi snem.Na kata ka daw ba ha ka jingkheiñ bnai Khasi ka long pura arphew phra sngi, kata ar kylla ba mih bnai, pyllun bnai bad ngen bnai. Hynrei ka jynthaw jong ka mariang ïa ka rukom mih bnai kam ju long ryntih, ha kaba teng teng ka duna bad teng teng ka tam na ka khatsaw sngi ka shikylla ba mih bnai, pyllun bnai bad ngen bnai.Kumta ka jingkheiñ bnai bneng Khasi kam long ryntih bad ka jingkheiñ jong I Ma Spiton Kharakor ka kylla manla u snem ba rakhe ïa u snem thymmai Khasi. Ha kawei pat ka liang, kaba kheiñ ryntih arphew phra sngi ka kham biang ban buh sngi, khamtam lei lei ïa ki sngi ïew. Ki sngi ïew kim ju kylla namar ba dei ka jingkheiñ kaba thaw hi da ki briew ha ka khaïi pateng. Ka rukom kheiñ sngi ïew ka dei sawsngi ba kut ha ka ïew rit bad bud ryngkhi sa saw sngi ba kut ha ka ïew bah. Kane ka rukom kheiñ ka long ryntih ïa baroh ki thaiñ ha Ri Khasi.
Wat lada ka khanatang ka kdew ïa ka Ïew Luri Lura jong ki laiphew mrad, hynrei ym don syrwet ban ai sabut ba ka khaïi pateng ka la don naduh dang kynthong ka pyrthei. Katba lah ban sngewthuh hi ka long ba lehse ka khaïi ka sdang ynda la seng hima sima namar ba ha kita ki juk kulong kumah ka mariang ka dang pahuh ban bsa bam ïa ki bynriew ne pynbiang kino kino ki jingdonkam shimet ha lade lane ïa ka longïing longsem lane ha ka imlang sahlang. Kumta ka syrwet saiñpyrkhat shaphang ka ïew ka dei da kawei pat ka dur ba ym lah ban mutdur ha ka juk mynta. Nalor kata wat haba la thnem bha ka khaïi pateng ruh ha kaba nyngkong ka dei beit da kaba shu ïa peiñ da ki mar ki mata, ym pat dei ka ïadie ïathied da u sbai, ba la mihpli mynta da ka pisa tyngka. Ka khaïi kumba sngewthuh mynta ka sdang na ka ïapeiñ da ki mar ki mata, nangta kaba ïapeiñ da ki mar bad ki sbai bad khatduh eh kumba long mynta da kaba ïadie ïathied da ka pisa tyngka.
Shwa ïa kata ka ïew dei da kawei pat ka rukom ba ïa lumpaid ki mrad ki mreng. Katba lah ban shemphang haba tih sani bad puson jylliew ïa ka jinglong jingman jong ka pyrthei mynnor ka long ba ka ktien ïew ka wan na ka ktien ïew. Kata ka ïew ka long ba ki mrad naphang ki juh ban lum lang ha kawei ka jaka ban ïew ïa kaei re kaei kaba baroh ki mrad ki lmun ban ioh mad. Kumta ka jingshisha kaba phalang na ki khanatang ka dei ka pharshi ka ba kdew ïa ka juk mynnor kulong kumah haba ka khaïi kam pat don tang ban shu ïa peiñ mar ruh, khlem da kren ïa kaba ïa peiñ sbai. Namar kata ka pharshi kaba phalang ka dei ba mynhyndai kulong kumah ki mrad ki mreng ki sim ki doh, wat ki dohkha dohpnat ruh ki kham lmun ban mad ïa ka um ka ba shngiam khamtam ha ka jaka ba don mluh. Ka mluh ka long ka mar kaba ym da ñiewkor than napdeng ki kynja jingbam jong ki mrad ki mreng ne ki sim ki doh ne ki dohkha dohpnat, hynrei ka dei pat ka ba kongsan tam ha baroh ki jait jingbam. Kumjuh ruh ka long ïa ki bynriew namar ba ym lah ban long ban ioh mad ïa kano kano ka bam khlem ka mluh ha kaba teng teng wat ïa ki kynja bathiang ruh la ju tah lang bad ka mluh. Kumta ka mluh kaba lang khyrdong ha ka um wah ne um pung ne um nan ka dei ba ki jynthaw baroh ki lmun ban leit dih um. Haba baroh ki mrad ki mreng, ki sim ki doh, ki dohkha dohpnat ki ïa lum lang ha kano kano ka bynta jong ka wah ba lah ban ioh mad ïa ka um bashngiam ba la khleh mluh, kata ka dei kaba ki ïew shwa la ba bang ka shngiam ne ka long kaba baroh ki kwah ban dih tngen kynthup ruh ïa ki bynriew. Kum ha kata ka jaka ba lah ban ioh mad ïa ka um-shngiam, ym don kino kino ki mrad kiba don por ban pyrkhat ïa kaba yn ïa thombor markylliang ban bam doh, hynrei ka jingshngiam jong ka ummluh ka pyntngen naphang ïa baroh ki jynthaw bad ka long ruh ka ïew ha ka pyrkhat mynnor kaba la kylla dur ha ka juk mynta kum ka ïew khaïi.
Kumta la shem ba haduh ka juk mynta ruh haba don ka khaïi kaba thnem, ki paidbynriew kim ju don kano kano ka jingsngew ban ïashun ïapen namar ba kaba ioh ban mad ïa ka umshngiam jong ka seispah ka pyntngen naphang ïa baroh. Dei ha kum kata ka sawdong sawkun ba ka jingïasngewthuh jingmut ka kyrsoi, hynrei ka dei ruh ka jaka ba kyrsopi ka bishni pihuiñ haba ki don ha la shimet kiba kwah rhah palat ban ïa kiwei wat haba ka long kaba pahuh. Ka dei ka jinglong briew ne jinglong mrad ruh ba kaba don ha la kti ym ju dap bad ju kwah ban klun shuh shuh palat ban ïa ba lah ban pyndonkam.
