Moscow, K’lyngkot:
U President ka Russia, Vladimir Putin ha ka Sngi Ba-ar u la ong ba ka jingiakren bad ka Ukraine ka lah ban urlong hynrei kam lah pat ban long bad u President jong ka- u Volodymyr Zelensky, namar ka jingleh jong u ka long kaba be-aiñ.
U President jong ka US, Donald Trump, u la maham tyngeh ïa baroh arliang ba ki dei ban pynkut noh shi syndon ïa katei ka jingïakynad kaba la neh la jan 3 snem mynta, ha kaba u la ong ha ka taiew ba la dep u Zelensky u kwah ban ïakren ïa ka jingiateh soskular ban pynsangeh noh ïa katei ka jingïakynad.
Namarkata, u Putin u la ong ba lada u Zelensky u kwah ban ïashim bynta ha ka jingïakren, un buh kyrpang ïa ki briew ban ïashim bynta ha katei ka jingïakren ban pynbeit halor kiei-kiei ki jingdonkam bad ki mat ba kongsan baroh. U Putin u la kren tikna ruh ba kane ka thma hapdeng ka Russia bad Ukraine, kan kut shen noh tang hadien jong kine ki ar bnai lane ka lah ban kham duna ia kata ruh lada ki ri Sepngi kin sangeh noh ia ka jingleit ai jingkyrshan ia ka Ukraine.
Wat la katta, la ong ba ka jingïakynad hapdeng kine arliang ri kam shym pat long kaba jai-jai wat haduh kine ki sngi wat lada u Trump ruh u la dep kular ban pynlong aiñ ïa ka jingsangeh thma kaba kyrkieh tang mar ia ioh shimti ia ka shuki President jong ka US.
