Chennai, Kyllalyngkot:
Haba pynkynmaw ïa ka jingpyndep ïa ka projek jong ka jylla ban buh ïa ki kamra pule ba la tip kum ki Smart Classroom na ka bynta ki klas rit ha ki skul sorkar ha kylleng ka jylla Tamil Nadu, u Myntri ka tnat Pule Puthi u Anbil Mahesh Poyyamozhi ha ka Lah Sngi U Blei u la plie paidbah ïa ka Smart Classroom kaba 22,931 na ka bynta ka Government Higher Secondary School ha Okkiyam Thoraipak.
Ka tnad pule puthi jong ki skul ka la shimkhia ban buh ïa ki 22,931 tylli ki Smart Classroom ha ki skul sorkar ban pynsuk ïa ki rukom hikai bad jingpule ba ïadei lyngba ki jingthoh, ki dur, ki sur bad ki durkhih.
Kane ka projek kaba la pyntreikam ha ka jinglut kaba T.455.32 klur, la khmih lynti ba kan ai jingmyntoi ïa ki 11,76,452 ngut ki khynnah pule ha baroh kawei ka jylla.
Ïa kane ka projek mynta la lah ban pyndep ha kylleng ki distrik, ha kaba ka la poi sha kaba kut ha ka jingplie ïa ka kamra klas kaba 22,931 ha ka Government Higher Secondary School kaba don ha Okkiyam Thoraipakkam.
Ha ka jingthoh kaba la phah ha ka rynsan X, u Myntri Rangbah jong ka jylla u MK Stalin u la ong ba u Myntri ka tnad pule puthi u Anbil Mahesh Poyyamozhi u la pyntip sha u halor ka jingpyndep ïa kane ka projek lyngba ka phone.
“Nga sngewkmen ïa ki jingjop jong ka tnad pule puthi ha ki skul kum ka jingpynthymmai ïa ki klas rit bad kumjuh ruh ki skul Model kiba ïarap ïa ki khynnah skul ban rung sha ki jaka pule ba kham heh. To ngin pyrta jam ba ki skul sorkar ki dei ka dak jong ka jingsarong jong ngi”, u la ong ha ka jingthoh ba la phah.
Nalor kata, 8,209 tylli ki Hi-tech Lab dang shna ha ki skul sorkar ha ka jinglut kaba T.519.73 klur ban ai jingmyntoi ïa ki 43,89,382 ngut ki khynnah skul.
Ka jingshna ïa kine ki Lab ka la jan dep. Kane ka jinglah jong ka sorkar ban pynbiang ïa ki jingdonkam kan ai jingmyntoi shibun ïa ki khynnah pule kiba don ha kylleng ki skul sorkar jong ka jylla Tamil Nadu.
