
Thiruvananthapuram:
Ki pulit jong ka Kerala, hynnin ka sngi, ki la kem ïa 27 ngut ki nong Bangladesh, kiba sah bad trei beaiñ ha Kochi. Da kane ka jingdon jong ki briew kiba la shah kem ha u bnai Kyllalyngkot ha kane ka jylla ka la kiew sha ka 34 ngut. Kane ka dei ka sien kaba nyngkong ba bun tam ki nong Bangladesh kin shah kem lang ha kane ka jylla.
Ka jingkhynra kaba khatduh, kaba la pynlong da ka kynhun ki pulit ka Ernakulam bad ka kynhun pyrshah lehnoh ka Anti-Terrorism Squad (ATS), ka la pynlong ïa ki ban shah kem 27 ngut ha ka thaiñ North Paravur jong ka nongbah Kochi jong ka Ernakulam distrik.
Katkum ka jingïathuh jong ki pulit, kine ki briew kiba la shah kem ki don ïa ki Aadhaar Card thok bad ki leh kum ki nongtrei bylla na West Bengal.
Kane ka jingpynshitom beiñ kaba khatduh eh ka long hadien ka jingïoh kem ïa arngut ki kynthei na Bangladesh, ka Rubina ba 20 snem ka rta bad ka Kulsum Akhtar ba 23 snem ka rta, ha ka Sngi Palei ka 30 tarik Kyllalyngkot kiba la ïoh ïa ki Aadhaar Card thok hadien ba ki la jam ïa u pud u sam sha West Bengal. Kine ki arngut ki la sah ha Kerala la jan shisnem, kaba sdang naduh u bnai Rymphang, 2024.
La ïathuh ba ki la ïoh ïa ki Aadhaar Card thok jong ki, lyngba uwei u nongïarap ha West Bengal.
Ki pulit ki dang peit bniah ïa kane, bad ki la sdang ïa ka jingtohkit ïa kito kiba la ïarap ïa kitei ki kynthei ban poi sha Kerala.
Ka jingkem kaba nyngkong hapoh kane ka jingkhynra ka la jia ar taïew shwa ha kaba la kem ïa ka Taslima Begum na Perumbavoor.
Hadien kane, saw ngut kiwei pat ki nong Bangladesh, u Hossain Belor, u Mohammed Liton, u Mohammed Bappi Sho bad u Mohammed Amin Uddin, ki la shah kem na ki jaka bapher bapher ha ka nongbah Kochi ha u bnai Kyllalyngkot.
Ki heh pulit, ki la pynlong ruh ïa ka jingtohkit kaba bniah ban lap shuh shuh ïa kito kiba la ïarap bad kyrshan ha ka ban pynrung tuh bad pynbiang ki kot ki sla sha kine ki bar ri.
Ki riewpaidbah ki la shah bthah ba ki la dei ban ai jingtip mar mar sha ki heh ba dei khmih lada don ki nong Bangladesh kiba sah beain ha Kerala.