New Delhi, Rymphang:
U Myntri jong ka sorkar kmie u Manohar Lal Khattar, ha kine ki khyndiat sngi ba la leit, u la jubab halor ka jingkynnoh jong u Arvind Kejriwal, uba long u nongai buit bad nonglum-nonglang jong ka seng AAP, pyrshah ïa ka sorkar Haryana, ha kaba ïadei bad ka um jong ka wah Yamuna bad u la ong ba ïa u heh nongïalam jong ka seng AAP, dei ban kitkhlieh ‘da ka aiñ’ halor ka jingkren jong u.
U Manohar Lal u la ong ba ka sorkar Haryana ka la mudui da ka ejahar ha ka ïingbishar jong ka Sonipat bad bynrap ba ka Election Commission ruh kan sa leh ïa kaba donkam ha kaba ïadei bad ka jingkren jong u Kejriwal.
“Ka jait jingkren kaba u ai, kam dei tang kaba bakla ha ka saiñ pyrthei hynrei dei ban kitkhlieh ïa u ha ka aiñ ruh kumjuh. Ka sorkar Haryana ka la ujor ha ka ïingbishar jong ka Sonipat…Ka Election Commission (EC) ruh kan shim khia ïa kane…” , la ong u Myntri ka sorkar kmie.
Kane ka long hadien ba u Convenor ka AAP u Arvind Kejriwal ha ka sngi Thohdieng ha ka shithi sha ka Election Commission u la pynpaw ïa ki jingkynnoh kiba jur pyrshah ïa u Myntri Rangbah ka Haryana u Nayab Singh Saini.
U la phah da ka jingthoh kum ka jingai jubab sha ka EC, da kaba dawa ba dei ban mudui mukotduma pyrshah ïa u Nayab Singh Saini ha kaba ïadei bad ka mat halor ka wah Yamuna kaba ‘don bih’.
U Kejriwal u la kynnoh ba ka jingjaboh jong ka Ammonia ha ka um khleh kaba la pynpoi sha Delhi na Haryana ka long ka ‘bym pat ju jia mynno-mynno ruh bad kaba shyrkhei’.
Ha katei ka shithi, u la kynnoh ba ka jingdon jong ka Ammonia, ka la sdang ban kiew bha naduh ka 15 tarik, Kyllalyngkot shaneng (kumba 3.2 janmiet ha ka 15 tarik Kyllalyngkot) bad ka la poi sha ka 7 baje janmiet hadien katto katne sngi.
U Kejriwal u la pynpaw ba ka Myntri Rangbah ka jylla ka Atishi ka la ïakynduh ïa u Myntri Rangbah jong ka Haryana ban pynbeit ïa ki jingeh; hynrei wat lada la pyrshang katto katne sien, ki jingeh ki dang sah khlem lah ban pynbeit.
Ka Myntri Rangbah ka Delhi ka la khot ïa u Myntri Rangbah ka Haryana ha ka taïew ba khatduh jong u bnai Nohprah bad kyrpad ïa u ban shim ïa ki lad ki lynti ban pynduna ïa ka Ammonia lane ban ai um shuh shuh ban pynsngem ïa ka.
“Watla u Myntri Rangbah jong ka Haryana u la pynthikna ïa nga ba un shim ïa ki sienjam kiba donkam, hynrei um shym la leh kumta. Hadien kata, ka Myntri Rangbah ka Delhi ka la khot biang ïa u bunsien. Hadien katto katne ki jingkhot, u Myntri Rangbah ka Haryana u la sangeh ban shim ïa ki jingkhot jong ka Atishi,” kumba la kdew ha ka shithi.
U la kynnoh ba ka ‘jingïasuhbuit sniew’ ka dei kaba la leh da u Myntri Rangbah ka Haryana ban pynkhih ïa ka ilekshon sha ka ïingdorbar thawaiñ jong ka Delhi.
“Ka la don ka jingïasuhbuit kaba thmu na ka liang jong u Myntri Rangbah jong ka Haryana, uba jia ryngkhat ba u dei na ka BJP, ban pynkhih ïa ka ilekshon ha Delhi da kaba phah ïa ki um kiba jakhlia bha sha Delhi. U la tip bha ba kane kan wanrah ïa ka jingduna um ka ban long da ka jingleh thok ha Delhi, kaba ka jingkynnoh jong u kan shong halor ka sorkar AAP ha Delhi. Kane kan jin da la pynlong la jan shiteng na ka Delhi khlem um bad kan jin da la wanrah ïa ka jingeh kaba khraw ïa ki paidbah kiba la jan kot sha ki 10 million ngut ki briew jong ka Delhi kiba la leit noh khlem um,” u la ong ha ka shithi.
U la kynnoh ba ka don ka jingleh shiliang khmat, da kaba pynpaw ba ha ka jaka ban leh pyrshah ïa u Myntri Rangbah ka Haryana, u Nayab Saini, ka ECI ka thmu ïa u.
“Nga sngew lyngngoh ruh ba ka CEC kam shym la pynmih kano kano ka hukum kaba bthah ïa u Myntri Rangbah jong ka Haryana ban sangeh noh ban pynjaboh ïa ki um jong ka Delhi shwa ka ilekshon. Hynrei, ka CEC ka la jied ban beh ïa nga,” u la bynrap ha ka shithi.
