Maham u Owaisi ïa ka Sorkar Kmie halor ka Waqf Bill

Ha ka shithi sha u Lamphang ka Lok Sabha u Om Birla, ki MP ki la kynnoh ba ïa ki jingpyrshah jong ki la pyndam khlem da pyntip ne pynshai lypa.

New Delhi, Rymphang:

U heh nongïalam jong ka AIMIM, u Asaduddin Owaisi, ha ka Lah Sngi U Blei, u la maham ïa ka sorkar, ba kan ym wanrah ïa ka Waqf (Amendment) Bill, 2024, ha ka dur kaba ka long mynta, da kaba ong ba kan wanrah ïa ka jingbym shong shngaiñ ha ka imlang sahlang ha ka ri. U Owaisi u la ong ba kane ka Bill ka kyntait ïa ka jaitbynriew Muslim baroh kawei.

“Nga mana bad maham ïa kane ka sorkar – lada phi wanrah bad thaw ïa ka aiñ Waqf ha ka dur kaba mynta, ka ban long ka jingpynkheiñ ïa ka Article 25, 26 bad 14, kan wanrah ïa ka jingbym shongsuk shongsaiñ ha kane ka ri. La kyntait ïa ka da ka jaitbynriew Muslim baroh.

“Phi kwah ban pynlong ïa ka India kum ka ‘Viksit Bharat’, ngi kwah ïa ka ‘Viksit Bharat’. Phi kwah ban rah biang ïa kane ka ri sha ki snem ’80 bad sdang ’90, kan dei ka jingkitkhlieh jong phi,” u la bynrap.

U la ong shuh shuh, “Kum u Muslim India uba sngew sarong, ngan ym duh wat shi inshi ruh ïa ka Masjid jong nga…ngan ym duh wat shi inshi ruh ïa ka Dargah jong nga. Ngan ym ailad ïa kata. Ngim nym wan shuh ban ai ïa ka jingïakren kaba ïadei bad ka hangne. Kane ka dei ka ïing ha kaba nga hap ban ïeng bad kren hok, ba ka imlang sahlang jong nga – ngi long ki nong India kiba sngew sarong ka dei ka mar jong nga, ym ba la ai da uno uno ruh phi lah ban knieh noh ïa ka na nga. Ka Waqf ka long ka rukom mane Blei na ka bynta jong nga.”

Shwa kane ka sngi, ki MP ka liangpyrshah, u Kalyan Banerjee (Lok Sabha) bad u Md. Nadimul Haque (Rajya Sabha) ki la pyrshah jur ïa ka jingweng ïa ki bynta na ki jingthoh ba la phah sha ka Joint Parliamentary Committee (JPC) halor ka Waqf (Amendment) Bill, 2024.

Ha ka shithi sha u Lamphang ka Lok Sabha u Om Birla, ki MP ki la kynnoh ba ïa ki jingpyrshah jong ki la pyndam khlem da pyntip ne pynshai lypa.

“Ha kaba ïadei bad ka jingsngewsih bad jinglyngngoh kaba khraw jong ngi, ngi lap ba ïa kine ki jingthmu bad ki jingthoh pyrshah la weng noh da u Chairman khlem da pyntip ïa ngi bad khlem ka jingmynjur jong ngi,” la thoh ki MP ha ka shithi jong ki kaba la thoh ha ka 3 tarik u Rymphang, 2025.