Ka jingdon jong ar tylli ki 5 Star Hotel ha nongbah Shillong ka la long shisha ka jingwanrah burom ïa ka Jylla Meghalaya, namar dei lyngba kine ki hotel kiba heh, ba kum ka Jylla ka la ïoh ban sakhi ïa ka jingwan jong ka lympung Indian Super League (ISL), ka lympung ïalehkai phutbol kaba heh tam hapoh ka Ri. Ym tang ka jingwan tang jong kane ka lympung, hynrei ngi la sakhi ba hadien ka jingïeng jong kine ar tylli ki 5 Star Hotel ha nongbah Shillong, kata ka Vivanta bad ka Courtyard bun ki jingïalang ba heh kum ka G20 Summit bad kiwei kiwei de la lah ban pynlong ha nongbah Shillong.
Katkum ki jingtip ba la ïohlum la ong ba dei na ka jingdon jong ki 5 Star Hotel hapoh ka nongbah Shillong ba la lah ban wanrah ïa ka lympung ISL. Katkum ki jingïathuh la ong ba ki rangïalehkai jong ki club ISL, ki la dawa beit ba ka jaka na ka bynta jong ki, kan dei beit ha ki 5 Star Hotel bad ym tang ki rangïalehkai, wat ki nongpynïaid bad ki referee ruh kim treh ban wan lada dei ba ym don kum kine ki hotel. Kumta ngi lah ban sngewthuh ba ka jingdon jong kine ki hotel ka la long shisha ka burom kaba khraw ym tang ïa ka jylla Meghalaya hynrei wat ïa ki nongshong shnong ba kin ïoh ban leit sakhi da la ki khmat ïa ki jingïalehkai jong kane ka lympung ha la ïing.
Kat nang ïaid ki sngi bad ki por, ki jingdawa ruh ki la nang jur. Ka jingkiew ha ki liang baroh, la ka dei ha ki kam ïalehkai ne kiwei kiwei ki bynta bad kum ka Jylla ruh la sakhi ba ka la lah ban ïohpdiang bun ki jingïalang bad ki jingïalehkai kiba heh bad nalor kine, la sakhi ruh ba ka jingwan jong ki nongtem ba pawnam ka pyrthei kaba la long ka burom ïa ka jylla. Hooid, kiba bun ki nongshong shnong ki ju pynpaw ba yn leh aïu ïa kum kine ki hotel kiba heh, ki bym ai jingmyntoi satia namar ka jingrem bad ba ki sngew ban leit rung sngew lehraiñ. Hynrei ngi hap ban sngewthuh ba lyngba kine ki hotel, ka khring pat ïa ki briew ba paw na kiwei pat ki jylla ne ki ri jong ka pyrthei bad ym tang katta, lyngba kine ki hotel, ka kyrteng jong ka nongbah bad jylla ruh ka paw ha kylleng.
Ngi hap ban sngewthuh ba lada ngi kwah ban kiew ngin hap ruh ban pdiang ïa ki projek kiba heh bad ruh ïa kum kine ki hotel kiba heh. Ka Sorkar ruh ka ju pyrshang na kawei ka por sha kawei pat ban wanrah ki lad pynroi kiba heh ba heh bad ka jingwanrah ka Sorkar ïa kitei ki ar tylli ki hotel ba heh ka la long shisha ka jingmyntoi na ka bynta ka jylla. Ka jingdon jong ki 5 star hotel ka kyntiew ïa ka jingroi ha ka ïoh ka kot. Ka jingpynroi ïa ki hotel kiba heh ka khring ïa ki nongjngohkai pyrthei kiba riewspah, kaba kyntiew ïa ka ïoh ka kot jong ka thaiñ lyngba ka jingpynlut kaba kham bun ha ka jaka sah, ka bam, bad ki kam ki jam. Kane ka pynmih khajna ïa ka jylla. Ki hotel 5-star ki plie lad plie lynti ruh ha ka ïoh kam ïoh jam, kynthup ki kam ha ka kam pdiang sngewbha, ka jingpynïaid, ka jingsumar, bad ki kam jngohkai pyrthei. Kane ka lah ban ïarap ban pynduna ïa ka jingbym don kam bad ban kyntiew ïa ki shnong ki thaw.
Ka jingdon jong kum kine ki hotel, ka wanrah ruh bun ki jingpynroi ïa ki jingtei kum ka jingwanrah ïa ka jingpynbha ïa ki jingtei ha ka thaiñ kum ki surok, ki kali paidbah, bad ki jingdonkam, kaba ai jingmyntoi ïa ki nongshong shnong kumjuh. Ka jingkyntiew ïa ka kam jngohkai pyrthei lyngba ka jingkhring ïa ki nongjngohkai pyrthei sha kane ka thaiñ. Da ka jingpynïaid ïew kaba biang, ki lah ban buh ïa ka Meghalaya ha ka map kum ka jaka jngohkai kaba itynnad, kaba kyntiew ïa ka kam jngohkai pyrthei hapoh ka ri bad shabar ri.
