Kohima, Rymphang:
U S Supongmeren Jamir uba long u MP (Lok Sabha) u la wanrah ïa ki katto katne ki mat kiba kongsan ha ka jingïakren halor ka Motion jong ka jingai khublei ïa ka jingkren jong u President ha Parliament.
Haba kynthoh ïa ka jingkren jong u President ba shiphew tylli ki jingïateh jingsuk la ïasoi da ka sorkar ha ka thaiñ Shatei lam-Mihngi ban kyntiew ïa ka jingsuk bad ban pynduh ïa ka jingsngew nongwei jong ki briew jong ka thaiñ, u la kynthoh ïa ka jingshisha ba ki ar tylli ki jingïateh ba la ïasoi ha Nagaland, ka “Framework Agreement” bad ka “Agreed Position kaba la ïasoi haduh mynta”, bad ha ki 8 snem ba la leit, haduh mnta ym pat shym la lah ban pyntreikam.
Da kaba bynrap ba ki don 26 tylli ki kynhun kiba treikam ha ka jylla mynta, kaba la pynlong ïa ka jingsiew khajna kaba khlem pynduna bad ka jingbamsap kaba la jyllei, u MP u la kylli hato ka sorkar pdeng, ka sorkar jylla ne ki kynhun saiñ hima-sima Naga ki dei ban kitkhlieh na ka bynta ka jinglong jingman kaba sngewsih? Nangta u la kyntu ïa ka sorkar pdeng ban pyntreikam ïa ki jingïateh kular ban kiew shaphrang ha ka liang ka ïoh ka kot bad ka jingsuk ha ka liang ka ïoh ka kot.
U la pynpaw ruh ïa ka jingsngewkhia halor ka jingbym don kaba paw jong ka jingmut jong ka Secularism ha ka jingkren jong u President bad u la pynskhem ïa ka bynta ba kongsan jong ka kaba tehsong ha kaba bat lang ïa ki kolshor, ki jinglong bad ki jaitbynriew bapher bapher kiba roi ha kylleng ka jaitbynriew.
U Jamir u la pynpaw shuh shuh ïa ki jingeh kiba jur bha ha ka liang ka jingtei kiba pynjynjar ïa ka Nagaland University, kynthup ïa ka jingbym don ki jaka ïalehkai hapoh bad shabar, ki jingtei jong ki hostel bad ki jaka khmih bniah, bad u la kyntu ïa ka sorkar pdeng ban ai ka jingkyrshan kaba donkam ban weng ïa kajuh ka jingeh. U la kyrpad ruh ban ai jaka shuh shuh na ka bynta ki samla pule kiba wan na ki jaitbynriew rit paid bad kiba wan na kiwei pat ki jylla.
