Imphal, Rymphang:
Ha ka por ba ka jingkhmih lynti ha Manipur halor mano ban bujli ïa u Myntri Rangbah ka jylla u N Biren Singh uba dang dep hiar shuki ka dang bteng, ka sorkar pdeng ka la ai da ka rai ban pynngat ïa kane ka jylla hapoh ka jingsynshar President hadien 22 snem.
Hadien ba la pynlong ïa ki jingïalang bakyrpang bad ki nongthaw aiñ jong ka BJP na ka bynta ar sngi, u nongïalam jong ka seng ha Northeast, u Sambit Patra, u la ïakynduh ïa u Lat ka jylla u Ajay Kumar Bhalla ha Raj Bhavan ha ka janmiet jong ka Sngi Ba-ar.
Ki jingtip ba bniah jong kata ka jingïalang kim pat shai bha. Ha kane ka sngi la donlang ruh u heh ka BJP ka jylla u A Sharda Devi ryngkat ki katto katne ki Myntri bad ki MLA.
Shuwa ban leit sha Raj Bhavan, u Patra u la ïakynduh ïa u Biren Singh. Ka BJP, ka paw, ba ka la phiah ha ki arliang: kawei kaba kyrshan ïa u Biren Singh bad kawei pat kaba kynthup ïa ki Myntri bad ki MLA kiba pyrshah ïa ka jinglong nongïalam jong u.
Uwei u nongthaw aiñ ba rangbah jong ka BJP u la ïathuh ha kane ka kotkhubor ba ka sorkar kmie ka lah ban pynjari ïa ka jingsynshar jong u President ha kane ka jylla.
“Nga ngeit ba ka hukum kan sa mih shen. Ka Assembly ka lah ban shah buh ha ka jingpynsangeh katkum ka kyndon 356 bad yn shah pynduh noh. Shisien ba la lap ïa u kyrtong thymmai ban long Myntri Rangbah ka jylla yn sa thaw biang ïa ka sorkar. Ka jingsynshar jong u President ka lah ban ym neh wat tang shi bnai ruh”, la ong u nongthaw aiñ.
Katkum ka jingong jong ka seng Congress kaba pyrshah, mynta ka sngi (11 tarik u Rymphang) ka dei ka sngi kaba khatduh na ka bynta ka jingshong dorbar jong ka ïingdorbar kaba la bthah da ka riti synshar ka ri.
Ka kyndon 174 (1) ka ong ba ym lah ban don ka jingïapher kaba palat ïa ka hynriew bnai hapdeng ka jingshong bakhatduh jong kawei ka dorbar thawaiñ bad ka jingshong ba nyng-kong jong ka dorbar kaba hadien, la ong ka Congress.
Ka sorkar jylla, ka la kyntu ïa ki briew, ba kin long kiba jemnud, katba u Lt Gen Abhijit S Pendharkar, General Officer Commanding of the Army’s 3 Corps, uba don ha Nagaland, u la leit sha Imphal ban bishar bniah ïa ka jingpynkhreh treikam jong ki jingthaw ïa ki kynhun seng.
Ha ka jingpynlait khubor, u Chief Secretary u PK Singh u la ai jingmut ïa ki briew ba kim dei ban ngat ha ki khubor ki bym pat lah ban pynshisha, ki khubor hamsaïa, ne ki jingpyntip bakla kiba lah ban wanrah ïa ka jingsyier ne pynthut ïa ka shongsuk-shongsaiñ.
“Ka la wan ruh ha ka jingtip jong ka sorkar ba ki katto katne ki briew bad ki kynhun ki bym don akor ki lah ban pyrshang ban pynmih ïa ka jingkulmar, ban pynthut ïa ka jingïatylli, bad ban pynphriang ïa ka jingtieng hapdeng ki paidbah lyngba ki jingtip kiba bakla, ki jingthoh kiba pynkhihwin, lane ki jingïathuhkhana ba la shna thok. Kine ki jingpyrshang ki long ban thaw ïa ka jingleh be-aiñ, bad la kyntu jur ïa ki paidbah ba kim dei ban sngap ïa kum kine ki jingpyntip bakla ne jingpynkhih,” la pule ha ka kyrwoh. Kane ka la jia katto katne kynta hadien ba ki riew kieng atiar ki bym lah ban ithuh ki la rahbor ïa u nongthoh khubor ba rangbah jong ka Imphal u Yambem Laba na ka ïingsah jong u ha ka por mynstep.
La pyllait noh ïa u ha ka por 1 nohphai sngi. U Laba, uba dei u dkhot barim jong ka Manipur Human Rights Commission, u dei u nongkynthoh tyngeh ïa u Biren Singh.
Ha ka Sngi Ba-ar, ki bor pahara ki la kem ïa 9 ngut ki lehnoh na Imphal West bad Tengnoupal District. Ki lehnoh ki dei ki dkhot jong ki saw tylli ki kynhun ba la khang pyrshah.
