Jerusalem, Rymphang:
U Myntri Rangbahduh jong ka Israel, Benjamin Netanyahu, u la byrngem ha ka Sngi U Blei ba un plie ïa ki khyrdop jong ka dujok ha Gaza lada ka Hamas kam pynphai biang noh ïa baroh ki nongshah rahbor da kaba kdew sha ka buit treikam lang jong ka US bad ka Israel ban ïakhun pyrshah ïa kitei ki lehnoh jong ka Palestine.
U Netanyahu u la bynrap ruh ba u la ïakren bad u Rubio ïa ka jingïohi jngai kaba bha na ka bynta ka lawei jong ka nongbah Gaza bad un iatrei lang ban pyntikna ba katei ka jingïohi jngai jongki, kan urlong shisha.
Dang shen, u Trump u la ai jingmut ba ka US kan shimti hi noh ïa ka Gaza Strip bad ban pynkylla ïa ka sha ka “Riviera of the Middle East”, katba kan pynkynriah jaka noh pat ia ki 2 million tam ki paidbah nongshong shnong ka Palestine sha kiwei pat ki ri, kynthup ia ka ri Egypt bad ka Jordan, ha kaba kane ka jingtyrwa jong u Trump, ka la wanrah ia ka jingbitar bad ka jingpyrshah jur na kiwei pat ki nongialam bad ki ri bapher jong ka pyrthei, lait noh ka Israel.
U Rubio ha ka sngi U Blei, u la ong ba ka jingtyrwa jong u Trump naka bynta ka nongbah Gaza ka lah ban pynkyndit bad pynlyng-ngoh ïa kiba bun.
Hynrei u la ong ba u President ruh u long uba la shemphang bha halor ka jingïohi jong u haba iadei bad ka lawei jong ka Gaza, ym kijuh ki jingmut ki bym da shong nongrim kumba la long ha ki por ba la leit noh, hynrei ka long kaei-kaei kaba u lah da iohi jngai shisha.
U la bynrap ruh ba ka jingthmu ba nyng-kong eh jong u Trump ka long ba ki nongshah rahbor kiba la shah set ha Gaza naduh ka jingshah thombor jong ka Hamas ha ka 7 tarik u Risaw 2023, ki donkam ban ioh wanphai noh sha la iing bad ka long kaba donkam kyrkieh haduh katta ban ioh pyllait noh ia ki na ka kti jong ki lehnoh Hamas.
