Ha ka sngi kut jong ka jingïalap ilekshon sha ar tylli ki Autonomous District Council (KHADC bad JHADC) kaba dei ruh ka sngi ba kongsan tam ïa kiba bun ki seng saiñpyrthei bad ki kyrtong kiba ïakhun ïa ka ilekshon. Ka jingïalap ilekshon kan kut noh ha ka janmiet jong ka 19 tarik Rymphang hadien ba ki Nongïalam na ki seng saiñpyrthei bapher-bapher, ki kyrtong kumjuh ki kyrtong shimet ki la ïoh ban leit khlei bad pynksan ïa la ki nia ki jutang ba ki don hakhmat u paidbah bad mynta kin ap pat sa ïa ka rai jong u paidbah ha ka 21 tarik kaba dei ka sngi thep vote bad ka rai ka ban mih pat ha ka 24 tarik Rymphang kaba dei ka sngi ñiew vote. Wat lada ki kyrtong ki la pyni ba ki khlaiñ ha manla ki jingïalang paidbah, hynrei ka sngi kaba kut ka ju dei ka sngi ba ki kyrtong ki pyni ïa ka jingkhlaiñ bad jingbun paid mar kylliang. Dei ha kum kane sngi ba ki kyrtong ki ïaleh kat lah kat ïai ban sei briew la ka dei ha ka jingïalang paidbah ne ka jingïaid paidbah.
Bunsien ki paidbah kiba peitkai narud, ki ju long ki nongrah khubor ïa ka jingbun briew bad jingduna briew ki kyrtong ha ka sngi ba pynkut ïa ka jingïalap ilekshon. Kumta, bun ki kyrtong kiba duna ki nongkyrshan ki kham kiar ban lum paidbah ha ka sngi kut jong ka jingïalap ilekshon namar lada duna briew ka long ka jingduh mynsiem ïa ki bad ïa ki nongkyrshan. Wat kiba thmu ban ai jingkyrshan ki kynran dien noh namar ki la dep ïohi ïa ka jingduna paid nongkyrshan. Hynrei lada khlaiñ ki kyrtong, khamtam lada lah ban pyni ha ka sngi bakut ka jingïalap ilekshon, wat kiba artatien ban ai jingkyrshan ruh ki lah ban pyrkhat da kumwei pat bad ai jingkyrshan biang.
Hynrei ki don pat ki kyrtong kiba ka rukom ïalap ilekshon ka long kynjah jar-jar tangba kum kine ki kyrtong ki buhrieh buit namar ki salia ïoh ba ki kyrtong kiba ïaleh pyrshah kin tip noh bad kin leh da kumwei pat ban khanglad ïa ka jingkhlaiñ jong kita ki kyrtong kiba ïaid jar-jar napoh. Hadien ka jingpyni ïa ka jingbun paid ki nongkyrshan, bad ka jingïalap na ki rynsan, ka shong mynta sa ha ka kti ki paidbah ïano ki sngewdei bad ki ïahap ban jied na ka bynta ban phah sha ka Ïingdorbar Thawaiñ jong ka KHADC bad JHADC.
Bun ki seng saiñ pyrthei ki don ïa ki kyrtong kiba la biang ha ka kyrdan pule bad kiba don ruh ka jingshemphang, hynrei ki don ruh kiba shu biang ka spah. Ki paidbah ki kham lah ïa kiba hehspah ne ïa kiba biang ki mat treikam, ka dei ka jingkylli kaba ym lah ban jubab. Lada peit ïa ki paidbah, ka paw kumba ka bor jong ka pisa ka treikam bha, namar ki paidbah ki ïaboi bha sha ki kyrtong kiba don ka pisa bad kiba lah ban pynbiang ïa ka jingdonkam shimet jong ki.
Hynrei ha ka 21 tarik u Rymphang 2025, kaba dei ka sngi kaba kyrpang ha kaba ki paidbah kin ïoh pat ban jied thymmai ïa ki nongthaw aiñ kaba long shisien ha ka san snem. Kumta ngi dei ban jied da ka jingkit-khlieh na ka bynta ban ïoh ïa ka jingshngaiñ jong ki nongshong shnong bad ka lawei jong ki khun ki kti bad ki pateng ban wan.
