Patna, Rymphang:
Ka Sorkar Bihar ba la ïalam da u Nitish Kumar, ka la mynjur ïa ki 146 tylli jingtyrwa, ha ka jingïalang jong ka kynhun Myntri, kaba long ha Secretariat jong u Myntri Rangbah ka jylla, ha ka Sngi Ba-ar. Ha kane ka jingïalang la don lang ki Myntri na baroh ki tnad treikam, ha kaba la pynïaid da u Myntri Rangbah ka jylla. Napdeng ki 146 tylli ki jingtyrwa, 120 tylli ki skhim na ka bynta ka Bihar. Ka jingmang pisa baroh jong baroh 146 tylli ki jingtyrwa ka don ka jinglut kaba la antad haduh T.30,000 klur.
Ha ka bynta kaba lai bad kaba saw jong ka Pragati Yatra, u Nitish Kumar u la leit jngoh ïa ki distrik kum ka Patna, Bhojpur, Jehanabad, Arwal, Gaya, Aurangabad, Nawada, Rohtas, Kaimur, Buxar, Lakhisarai, Jamui bad kiwei kiwei ki distrik.
Shwa ïa kane, la mynjur T.20 hajar klur na ka bynta ki 187 tylli ki skhim ha ka thaiñ Shatei-lam-Mihngi jong ka Bihar ha ka jingïalang jong ka kynhun Myntri ba dang shu dep. Ka jingbei tyngka baroh ka long T. 50,000 klur, kaba ïahap bad ki jingpynbna ba la pynmih ha ka por jong ka Pragati Yatra jong u Myntri Rangbah. Hadien ba la mynjur ha ka kynhun Myntri, ïa kine ki jingtyrwa yn sa mynjur ha ka dorbar mang tyngka jong ka Ïingdorbar Bihar ban wan ka ban sdang naduh ka 28 tarik u Rymphang.
Ki tnad sorkar kiba bun ki la ïoh ïa ki jingmynjur ha ka mang tyngka na ka bynta ki projek ba kongsan jong ki jingtei bad ki projek jingbha jingmiat. Kiba bun ki jingtyrwa ki dei kiba ïadei bad ka tnad kam nongkyndong ba kynthup ïa ka jingshna surok, ka Jan Jiwan Hariyali, ka Tola Sampark Yojana, ka Har Ghar Nal Ka Jal bad kiwei kiwei.
Nalor kane, kiwei pat ki tnad, ki kynthup ïa ka pule puthi, ka koit ka khiah, ka rep ka riang, ka ri mrad bad ka ri dohkha, ka jingpynroi sor, ka Public Health Engineering, ka tnad Water Resource, ka tnad shna surok, ka jingïalehkai, ka jingpynroi ïa ki jingtei, bad ki jingthmu ban ïarap ïa ki paidbah.
Ka kynhun Myntri ka jylla ka la mynjur ïa ka pisa na ka bynta ka Buxar na ka bynta ki kam pynroi, ka Auditorium bad ka Science Bhawan ba thymmai ban tei da ka jingbei tyngka kaba T.47 klur ha Magadh Mahila College Patna bad ka jaka pule-puthi bathymmai yn tei ha Kaimur.
Ka jingpyrkhat jong ka sorkar ïa ka thaw kam thaw jam, ka jingpynroi ïa ki jaka niam, bad ka jingpynbha ïa ki jaka paidbah ka pyni ïa ka buit treikam kaba bniah na ka bynta ka jingroi ha ka jylla baroh kawei. Ki jingmynjur ki thmu ban pynsted ïa ka ïoh ka kot, ka jingpynbha ïa ki jingtei, bad ka jingbha jingmiat jong ki paidbah ha Bihar shwa ka ilekshon sha ka ïingdorbar thawaiñ jong u snem 2025. Kane ka jingai pisa kaba heh ka pynpaw ïa ka jingangnud jong u Nitish Kumar na ka bynta ka roi ka par ha ka jylla baroh kawei bad ka wan ha ka por kaba kongsan katba ka Bihar ka dang pynkhreh na ka bynta ka ilekshon jylla ban wan.
