New Delhi, Rymphang:
U nongïalam ka liang pyrshah ha ka ïingdorbar jong ka Delhi u Atishi u la kynnoh ha ka sngi Palei ba ki MLA jong ka Aam Aadmi Party (AAP) ki la shah wengkam na ka ïingdorbar na ka bynta lai sngi namar ba ki la pynmih ïa ki kyntien ‘Jai Bhim’.
“Ka BJP ka la ïaid lait ïa u pud jong ka jingsynshar donbor hadien ba ka la wan ha ka bor. Ki MLA jong ka Aam Aadmi Party ki la shah wengkam na ka ïingdorbar haduh lai sngi namar ba ki la pyrta ‘Jai Bhim’. Bad mynta ki MLA “AAP” kim shah wat ban rung shapoh ka jaka jong ka Vidhan Sabha. Kane kam pat ju jia ha ka histori jong ka Delhi Legislative Assembly ba ki MLA kiba la shahjied kim ïoh jingbit ban rung hapoh phyllaw jong ka Assembly,” la ong ka Myntri Rangbah barim ka Delhi ha ka jingthoh ba la phah ha ka rynsan X.
Ki la don kumba 21 ngut ki MLA ka AAP ba kynthup ïa ka Atishi ki la shah wengkam na ka ïingdorbar jong ka Delhi na ka bynta lai sngi namar ba ki la pynthut ïa ka jingkren sdang jong u Lieutenant Governor u V K Saxena ha ka ïingdorbar ba dang shu thaw thymmai ha ka sngi Ba-ar.
Ïa kane ka jingtyrwa ban wengkam ïa ki la wanrah da u Parvesh Verma, Myntri ka tnad Public Works Department (PWD) jong ka Delhi bad la pdiang lyngba ka Voice Vote hapoh ka ïingdorbar. Ki MLA kiba shah wengkam kin ym ïoh jingbit ban ïashim bynta ha ka jingïalang jong ka ïingdorbar ha ka 27 bad 28 tarik u Rymphang.
“Kan don ka jingïakren halor ka CAG hapoh ka ïingdorbar. La tyrwa ïa ka ‘Diverting Attention’ Motion (da ka AAP)… Ki kyrteng jong ki dkhot jong ka ïingdorbar kiba kwah ban kren halor ka CAG ki dang pur ha ka jingbun paid… Ka jingthmu ha lyndet jong ka jingpynslem (ka kaiphod jong ka CAG da ka AAP) ka long ban khanglad ïa ka jingshisha ban poi sha ki paidbah,” ong u Lamphang ka ïingdorbar jong ka Delhi u Gutap ha ka sngi Palei.
Ha ka sngi Ba-ar, ka kaiphod jong u Controller bad Auditor General (CAG) ba la wanrah ha ka ïingdorbar ka la kynnoh ba ka sorkar Delhi ka la mad ïa ka jingduhnong kaba la lum lang haduh palat T.2,000 klur namar ka rukom pyntreikam ha ka tnat Excise jong u snem 2021-2022 namar ki daw kiba sdang naduh ka jingthmu shwa ban pyntreikam kaba tlot haduh ka jingbym biang ka jingpyntreikam.
Ka kaiphod, kawei na ki 14 tylli, halor ka jingtreikam jong ka sorkar Aam Aadmi Party barim, la wanrah da ka Myntri Rangbah bathymmai jong ka BJP, ka Rekha Gupta, ha ka sngi kaba ar eh jong ka dorbar banyngkong jong ka ïingdorbar jong ka Delhi, kaba dang shu shah jied thymmai.
Ka kaiphod kaba 208 sla kaba kynthup ïa ki jingpynrung ka la pynpaw ïa ki jingkynnoh pynkheiñ ha ka rukom ai laisen bad ka la kdew ba ki jingai jingmut jong ka kynhun ki riew shemphang, kiba la thaw ban ai jingmut ïa ki jingkylla na ka bynta ban thaw ïa ka polisi ba la weng noh mynta, la ïathuh ba la iehnoh beiñ da u Symbud Myntri Rangbah ba ha kata ka por bad u Myntri ka tnat Excise u Manish Sisodia.
