Bhopal, Nailar:
Ka sorkar Madhya Pradesh, wat hadien ba ka la khang ïa ka dawai jyrhoh ‘Coldrif’ ka dang ïai bteng ban pynlong ïa ka jingkhynra ha kylleng ki jaka, khamtam hadien ba la don kiba die tuh ïa kine ki jait dawai kiba la khang pyrshan ban die paidbah.
Kane ka jingkhang ban die ïa kine ki dawai, ka la long naba la don kiba kem pang bad ïap hadien ba la dih ïa ki.
Kane ka jingtreikam ka la long na ka jinglap sakhi na ki kynhun wad bniah jong ka Tamil Nadu Drugs Control Department’s, kaba pynthikna ba ka don 48.6 percent ka Diethylene Glycol (DEG)-ka dawai khleh kaba don bih ha une u dawai. Ka la don ka jingïap briew ha Madhya Pradesh, ha u snem ba la lah naba dih ïa ki dawai jyrhoh ba don ïa kane ka jingkhleh.
Ka sorkar Madhya Pradesh ka la pynskhem ba ka dang “ap ïa ki kaiphod” bad ba “ym shym la lap ïa ki tynrai ba sniew haduh mynta.” Hynrei ka tnat Food and Drugs Administration jong ka jylla, ka la pynmih ïa ka jingbthah kaba kyrkieh sha baroh ki nongpeit ïa ki dawai ha kylleng ka jylla, da kaba khang ban die bad sam ïa ka ‘Coldrif’ Syrup bad baroh kiwei pat ki dawai kiba la shna da ka Sresan Pharmaceuticals – ka kompeni kaba don ha Kanchipuram, Tamil Nadu.
Ka shithi, kaba la thoh sha baroh ki nongpeit ïa ki dawai ha ki distrik, ka la bthah ïa ki ban “sangeh noh mardor ïa ka jingdie bad jingsam ïa ka dawai ‘Coldrif’, ban shim ïa ki sienjam kiba donkam, bad ban pynsangeh noh ban sam ne die ïa kine ki dawai kiba don”.
“Ka jingdie ïa baroh kiwei pat ki mar jong ka kompeni ruh dei ban sangeh bad phah ïa ki nongmuna ban Test kyrkieh,” la ong ka khubor.
U Myntri Rangbah ka jylla u Mohan Yadav u la ong, “Ka jingïap jong ki khynnah ha Chhindwara na ka daw jong ka dawai Coldrif ka long kaba sngewsih haduh katta katta. Ka jingdie ïa kane ka dawai la khang ha baroh kawei ka jylla Madhya Pradesh. Ka jingdie ïa kiwei pat ki mar jong ka kompeni kaba shna ïa kane ka dawai ruh ka dang shah khang kumta. Ka karkhana pynmih dawai ka dei kaba don ha Kanchipuram, kumta hadien ba la tip ïa katei ka jingjia, ka sorkar jylla ka la bthah ïa ka sorkar Tamil Nadu ban tohkit halor ka jingjia. Ïa ka kaiphot halor ka jingtohkit la ïohpdiang ha kane ka step. La shim ïa ki sienjam kiba tyngeh katkum ka kaiphod.”
U la bynrap ba la thaw ïa ka kynhun ba kyrpang ban tohkit ïa kane ka jingjia ha ka kyrdan jong ka thaiñ bad ka jylla, da kaba pynthikna ba “ki nongleh kam sniew kin ym lait na ki kti jong ka aiñ.”
Haduh ba la pynpaw ïa kane ka jinglap jong ka Tamil Nadu, baroh arngut u Myntri ka tnat ka koit ka khiah jong ka Madhya Pradesh u Rajendra Shukla bad ka tnad jong u ki la kyntait paidbah ïa kano kano ka jingïadei hapdeng kine ki dawai bad ki jingïap briew. U Shukla u la ong, “Ki nongmuna ba la test haduh mynta kim shym la pyni ïa kano kano ka jinglong bih ki dawai. La ap ïa ki kaiphod na ki Lab jong ka sorkar pdeng.”
Katkum ka jingïathuh jong ki bahaïing jong ki khynnah kiba ïap ha Madhya Pradesh, ki don ïa kijuh ki dak ki shin kum ka jingshit, jingprie bad ka jingsangeh kynsan jong ka umpynjhieh kaba pynpaw na ka jingktah ka jinglong bih ka DEG.
