Hyderabad, Nailar:
U Myntri Rangbah ka jylla Telangana u A Revanth Reddy u la bthah ïa ki ophisar ban pynkhlaiñ ïa ka pule puthi ha baroh kawei ka jylla bad ban pyntikna ha ka ban leit jurip bniah kumba la buh thong hashwa sha kylleng ki skul. U la ai jingmut ruh ba ki Additional Collector ki dei ban leit jngoh ym duna ïa ki ar tylli ki skul sorkar man la ka taïew.
Haba pynïaid ïa ka jingïalang bishar bniah bad ki heh jong ka tnad pule puthi ha Integrated Command Control Centre, la pyntip sha u Myntri Rangbah ba mynta u snem pule ki don 48 hajar ngut ki khynnah skul kiba la kynriah na ki skul shimet sha ki skul sorkar.
Haba jubab ïa ka jingkiew dor, u la bthah ban tei ïa ki ïing bad ki kamra klas kiba thymmai ban pyndap ïa ka jingbun ki samla pule kiba nang kiew. U la ban jur ruh halor ka jingdonkam ban pynbiang ïa ki jaka kiba biang na ka bynta ki khynnah kiba donkam kyrpang.
Haba pynpaw ïa ki jingeh ha ka koit ka khiah kiba ki kynthei ki ïakynduh kiba pynkhreh ïa ki jingbam sngi da kaba pyndonkam da ki Gas bad ki dieng, u Myntri Rangbah u la khot ban buh ïa ki Solar Kitchen ha ki skul ban weng ïa ki jingeh ha ka jingring mynsiem.
Da kaba sngewkhia ïa ka jingïapher hapdeng ki khynnah kiba la pass ïa ka klas 10 bad kiba pynrung kyrteng ha ka kyrdan pule ba pdeng, u la ban jur ïa ka jingdonkam ban pynthikna ba baroh ki khynnah kiba la pass ïa ka klas 10 kin bteng ïa ka jingpule jong ki. Nalor kata, u la ai jingmut ban ai jinghikai ban pynroi ïa ka jingtbit na ka bynta kiba pass ha ki kyrdan kiba pdeng ban pynkhreh ïa ki na ka bynta ka jingim kaba kham bha.
U nongai jingmut jong u Myntri Rangbah u V Narender Reddy, Special Secretary B Ajith Reddy, Education Secretary Yogita Rana, Technical Education Commissioner A Sridevasena, Special Secretary M Haritha, bad kiwei pat ki la ïadon bynta ha ka jingïalang.
