Chennai, Nailar:
Ki nongrep ha ka thaiñ Delta ki la pdiang sngewbha ïa ka jingai jingkyrshan ba la pynbna da u Myntri Rangbah ka jylla C Joseph Vijay ha ka Ïingdorbar Thawaiñ ha ka lah sngi U Blei, watla ki don kiba ong ba ka pisa ka kham duna ban ïa kaba la kular ha ka jingpynbna jong ka TVK.
U Myntri Rangbah ka jylla u C Joseph Vijay ha ka lah sngi U Blei u la pynbna ïa ka jingai jingkyrshan kaba T.289 shi kwintal na ka bynta u kba ba bha bad T.159 shi kwintal ïa u kba ba ju long. Ïa ka jingai jingkyrshan ne jingïohnong na ka bynta u pai la buh ban long T. 709.50 shi ton.
U Sami Natarajan, uba long u State General Secretary jong ka TN Farmers Association u la ong ba da kane ka jingpynbna ba thymmai, ki nongrep kin ïoh T.2,750 shi kwintal na ka bynta u khaw ba bha bad T.2,600 shi kwintal na ka bynta u khaw ba long pdeng.
“Kane ka jingkiew dor ka long kaba pdiang sngewbha. Watla ka TVK ka la pynbna ban siew T.3,500 shi kwintal u khaw, hynrei ïa kane ka jingpynbna kaba mynta lah ban shim kum ka sienjam kaba nyngkong. Ngi kyrmen ba ka sorkar kan pyndep ïa ka jingkular jong ka kaba T.3,500 ha ki snem ban wan,” u la ong.
U P Govindaraj, Secretary jong ka seng ki nongrep pai, u la kdew ba ka sorkar ka la pynbna ban siew T.4 hajar shi ton u pai.
“Kan jin da la bha lada ka sorkar ka la pynbna T. 4,500 shi ton kumba la kular ha ka TVK Manifesto,” u la ong bad bynrap ba ki nongrep ki la ju dawa T. 5,000 shi ton namar ka jingkiew dor stet jong ki sboh dawai.
“Ngi pdiang sngewbha ïa ka jingpynshlur kaba la pynkiew na ka bynta ki jait jingthung kiba bha bad na ka bynta kiwei pat ki jait jingthung ruh ha kawei ka jingjia. Wat hapdeng ka jingeh ha ka liang ka pisa tyngka, u Myntri Rangbah ka jylla u la pdiang ïa ka jingdawa jong ki nongrep bad u la pynkiew ïa ka dor jingkyrshan. Nga ai khublei ïa u bad ïa ka sorkar Tamil Nadu da ka dohnud baroh. Nga kyrmen, lada ka kyrdan jong ka ïoh ka kot ka kiewh ha ka jylla ha kine ki snem ban wan, ka sorkar kan sa pynbiang shuh shuh ïa ki jingïohnong,” la ong u S R Tamilselvan jong ka Tamil Nadu Farmers’ Protection Association, Nagapattinam.
