Chennai, Rymphang:
Da kaba pynrem ïa ka jingshah kem khah-khah jong ki nongtong dohkha na India ha ki shipai duriaw jong ka Sri Lanka, ki nongtong dohkha na Rameswaram ki la bteng ïa ka jingïakhih khlem buh por ha ka Sngi Palei kaba la ïaid san sngi lynter. Da kaba kyntait ban pynsangeh ïa ka jingïakhih ha ka jingïakren ïasuk kaba la long ha ka Sngi Palei, ki seng jong ki nongtong dohkha ki la pynbna ba kin pynlong ïa ka jingïakhih shah thngan khlem buh por naduh hynnin ka sngi.
Ki seng ki nongtong dohkha ha Rameswaram ki la pynpaw ba palat 100 ngut ki nongtong dohkha na Ramanathapuram ki la shah kem ha ki shipai duriaw jong ka Sri Lanka namar ka jingkynnoh ba ki la pynkheiñ ïa ka aiñ IMBL ha kine ki ar taïew ba la dep.
Ha kine ki snem, da ki spah tylli ki lieng, ki la shah kurup ha ki shipai duriaw jong ka SL Navy bad ka sorkar Lanka, ka thmu ban die lilam ïa ki lieng, kiba la shah kurup. Da kaba pynbor ïa ka sorkar pdeng ban shimkhia ban weng ïa katei ka jingeh kaba la pynslem, ki nongtong dohkha ki la sangeh treikam khlem kut por naduh ka 23 tarik u Rymphang.
Ki la don palat 700 tylli ki lieng kiba la sahkut ha ki kad lieng ha Rameswaram ha ka sngi kaba san.
Ha kane ka Sngi Palei, u nongkhmih jong ka Rameswaram u Abdul Jaffer, DSP jong ka Rameswaram u Shanthamurthy bad ki ophisar na ka kynhun ki nongtong dohkha bad ka tnad Revenue ki la pynlong ïa ka jingïakren ïasuk bad ki nongtong dohkha da kaba kyntu ïa ki ban pynsangeh noh ïa kane ka jingïakhih khlem buh por kaba dang ïaid shakhmat.
Hynrei ki nongtong dohkha ki la kyntait ban leh kumta bad ki la pynpaw ba kin bteng ïa ka jingïakhih tad haduh ba ka sorkar pdeng kan pynbeit ïa ki jingeh kiba la slem jong ki.
