New Delhi, Lber:
U Myntri ka tnat ki kam pohïing jong ka sorkar pdeng u Amit Shah ha ka sngi Saitjaiñ u la bishar bniah ïa ka jinglong jingman ha ka liang ka jingshngaiñ ha Manipur da kaba pynleit jingmut ha kaba wanrah biang ïa ka jinglong jingman ha ka jylla kaba la don hapdeng ka jingeh bad ban aiti ïa ki tiar beaiñ bad kiba la lute kiba la bat da ki kynhun bapher bapher, la ïathuh ki tyllong khubor.
Kane ka dei ka jingïalang kaba nyngkong eh kaba la pynlong hadien ba la pynjari ïa ka jingsynshar President ha kane ka jylla jong ka thaiñ Shatei-lam-Mihngi, kaba la sakhi ïa ka jingïakynad jaitbynriew naduh u bnai Jymmang, 2023.
Ki la don palat 250 ngut ki briew ki la duh ei ïala ka jong ka jingim ha kiba bun ki jingshah thombor.
“U Myntri ka tnat ki kam pohïing u la shim ïa ka jingkheiñ ïa ka jinglong jingman jong ka jingshngaiï ha Manipur. La ai ïa ka jingpynshai kaba bniah halor ka jinglong jingman jong ka ain bad ka suk ka saiñ ha ka jylla baroh kawei,” la ïathuh ki tyllong khubor.
Ki tyllong khubor ki la bynrap ba ka jingthmu jong kane ka jingïalang ka long ban wanrah biang ïa ka jinglong kaba thikna kumba ka long shwa u bnai Jymmang, 2023 bad ban aiti noh ïa ki tiar ïaleh ba la buh beaiñ bad kiba la lute kiba la bat da ki kynhun bapher bapher.
U Lat ka jylla u Ajay Kumar Bhalla, ki heh ophisar jong ka sorkar Manipur, ki shipai, ki shipai Paramilitary ki la leit ban ïashim bynta ha kane ka jingïalang.Ka jingsynshar President ha Manipur ka la long naduh ka ka 13 tarik, Rymphang, hadien ba u N Biren Singh u la iehnoh ïa ka kam Myntri Rangbah ka jylla.
Ïa ka ïingdorbar Jylla, kaba don ïa ka por treikam haduh u snem 2027, la buh hapoh ka jingshah pynsangeh kaba shipor.Ïa kane ka jingbishar bniah ïa ka jingpahara la pynlong hadien ka jingpynbna kaba la ai da u Lat ka jylla ha ka 20 tarik, Rymphang ïa baroh kiba bat beaiï ïa ki tiar siat bad kiba la lute ba ki la dei ban aiti noh.
