New Delhi, Lber:
U President ka BJD uba dei ruh u nongïalam ka liang pyrshah u Naveen Patnaik ha kine ki khyndiat sngi ba la leit u la ther tyngeh ïa ka sorkar pdeng bad ka sorkar Andhra Pradesh kaba la ïaid shakhmat bad ka projek dam Polavaram da kaba pynkheiñ ïa ka khusnam jong ka Godavari River Water Disputes Tribunal.
Haba kren ha ka jingïalang pyrshah kaba heh ha Motu ha ka distrik Malkangiri ba la pynlong da ka Joint Action Committee lyngba ka Video Conference, u Myntri Rangbah barim u la ong ba ka jingpyntreikam ïa kane ka projek khlem da khmih bniah, jingbishar bniah bad jingkheiñ ïa ka um shadien jong ka map ba la pynkylla kan buh ïa ki riewlum ha ka jingma kaba khraw.
Da kaba pynpaw ba ka pdeng ka la mynjur T.18,000 klur ha ki ar tylli ki mang tyngka ba la dep ban rah ïa ka projek shakhmat, u Naveen u la ong ba ka jingïakhun jong ka BJD pyrshah ïa ka dam kan dang ïai bteng namar ka jingsam ïa ki marpoh khyndew jong ka Pdeng halor ka nongrim jong ki jingpyrkhat saiñ pyrthei ka pyntlot ïa ka rukom treikam jong ka sorkar pdeng.
Shuh shuh u la ong ba ka projek Polavaram ka long pyrshah ïa ka jingmyntoi jong ki riewlum jong ka Malkangiri namar bun ki shnong kin ngam jyllop bad da ki hajar ngut kin duh noh ïa ki jaka puta jong ki.
Ka hukum jong ka Supreme Court ban shim ïa ka rai da kaba ïamir jingmut bad ki jylla ban shah ktah ha kane ka projek ruh la iehnoh beiñ, u la pynshisha.
“Ka projek ka la sahkut namar ka jingpyrshah na ka BJD. Nga la khring ïa ka jingmut jong u Myntri Rangbah bad u Myntri ka sorkarkmie uba dei khmih ïa ka tnat sam um ha ki por bapher bapher shaphang ka jingjulor kaba ka projek Polavaram kan wanrah ïa ka Odisha. Hynrei kine kim shym la ai jingmih ei ei”, u la ong.
Utei u nongïalam liangpyrshah u la ong ba uwei u nongïalam riewlum ba pawnam jong ka Odisha u bat mynta ïa ka Union Tribal Affairs Ministry.
“U kyrmen ba un pyrshang ban ïada ïa ka jingmyntoi jong ki riewlum jong ka Odisha”, la bynrap biang u Naveen.
Ha katei ka sngi, la pynlong ïa ka jingïalang pyrshah da ki nongmihkhmat jong ki 14 tylli ki seng riewlum. Ki nongïalam ka BJD, Dalit Samaj, Bahujan Samaj Party bad ki katto katne ki sengbhalang ki la ïashim bynta ha kane ka jingïalang bad ki la shim ïa ka rai ban bteng ïa ka jingïakhun pyrshah ïa ka projek Polavaram.
Ki nongïalam shnong na ki jaka ki ban shah ktah ha kane ka projek ha Andhra Pradesh bad Chhattisgarh ruh ki la ïadon lang.
