Mumbai, Lber:
Ki pulit ka Jalgaon ha ka Lah Sngi U Blei ki la kem sa arngut ki briew ryngkat uwei u khynnah shynrang uba dang rit ka rta ha kaba ïadei bad ka jingthombor ïa ka khun jong u Raksha Khadse Myntri ka sorkar pdeng bad ki katto katne ki paralok jong ka, la ïathuh uwei u heh sorkar. Da kane, la kem saw ngut ki briew haduh mynta ha kane ka kam thombor.
Lah ban kdew hangne ba ki don hynriew ngut ki briew kiba la shah jer kyrteng ha ka jingujor ejahar, kaba la buh halor ka jingujor jong u Khadse ha Muktainagar Police Station ha Jalgaon distrik jong ka Maharashtra ha kaba ïadei bad ka jingjia kaba la jia ha Sant Muktai Yatra ha ka shnong Kothali ha ka miet 28 tarik u Rymphang.
Uwei u briew uba la tip kyrteng kum u Kiran Mali, u la shah kem kham hashwa, katba ki pulit ka Jalgaon, ki la kem sa arngut kiwei pat – u Aniket Bhoyi bad u Anuj Patil – bad ki la kem ruh ïa uwei u khynnah shynrang uba dang rit ka rta, ha ka Lah Sngi U Blei, ong u heh pulit na Muktainagar Police Station. Ka jingpyntreikam ka la ïaid ban kem ïa uwei pat uba shah kynnoh, u la ong.
Kine ki hynriew ngut ki la shah pynngat ha ki kam pynkulmar bad kiwei kiwei ki kam runar katkum ka aiñ Bharatiya Nyaya Sanhita bad ka aiñ ïada ïa ki khynnah na ki kam leh beijot (POCSO), katba ïa ki kyndon jong ka aiñ Information Technology la pyndonkam naduh ba ki pyrshang ban shondur bad ring video ïa ki khynnah kynthei khlem jingbit, ong ki pulit.
Ha ka jingtohkit ki pulit ki la lap ba utei u ba shah kynnoh u la leh khlem akor bad katto katne ngut ki khynnah kynthei bad wat ban ïaleh pyrshah ruh bad ki nongap pahara kiba don ryngkat bad ki.
Kawei ka khynnah kynthei kaba dang 17 snem ka rta ka la ujor, bad ki nongap ki la jer kyrteng ïa ki hynñiew ngut kiba shah kynnoh.
Haba ïakren bad ki nongthoh khubor ha ka sngi U Blei, u nongïalam ka BJP u Khadse u la ong, “Nga don ha Gujarat, kumta ka khun jong nga ka la phone ïa nga ban pan jingbit ban leit. Nga la bthah ïa ka ban shim ïa u nongap bad ar ne lai ngut ki nongtrei ryngkat. La bud bad khynñiat ïa ka khun jong nga bad ki paralok jong ka, bad la shon bad ring ïa ki dur bad ki video jong ki. Haba ki nongpahara ki la pyrshah ïa kane, kine ki briew ki la leh bymsalia, bad ka kynhun jong ki briew kiba 30 haduh 40 ngut ki la ïalum bad ker tawiar.”
Ka Khadse ka la ong ba haba ka la leit phai sha la ïing ha ka step jong ka Sngi U Blei, ka khun jong ka ka la ïathuh ïa ka ba katei kajuh ka kynhun ka la leh bakla ïa ka ha ka 24 tarik u Rymphang ha kawei ka jingïalang paidbah.
“Ka long kaba sngewsih. Lada kum kine kiei kiei ki jia ïa ka khun MP ne Myntri ka sorkar pdeng, pyrkhat ïa kaei kaba ki briew kiba rit paid ki hap ban ïaid lyngba,” ka la ong.
Ka kong Khadse ka la ong ba ki katto katne ki nongshong shnong ha Muktainagar ki la ïathuh ïa ka ba kane ka kynhun ka pyndik ïa ki khynnah kynthei ha ka por ba ki leit skul.”Nga la ïakren bad u Myntri Rangbah ka jylla bad u Deputy Superintendent of Police,” ka la ong. U Myntri Rangbah ka Jylla, u Devendra Fadnavis, ha ka Sngi U Blei, u la pynthikna ban leh da kaba tyngeh halor katei ka kam.
