New Delhi, Lber:
Ka Enforcement Directorate (ED) ka la kem ïa u MK Faizy uba dei National President jong ka Social Democratic Party of India (SDPI) hapoh ka aiñ Prevention of Money Laundering Act (PMLA) halor ka jingkynnoh ba u don ka jingïadei ha ka liang ka pisa-pilaiñ bad ka seng Popular Front of India (PFI) kaba la shah khang pyrshah.
Hadien ka jingshah kem jong u ha kad liengsuiñ jong ka Delhi, ïa u Faizy la rah hakhmat ka Patiala House Court, ha kaba u nongbishar ba kyrpang u Chander Jit Singh u la ailad ïa ka kynhun ED ban set phatok ïa u da hynriew sngi.
La buh ban wanrah biang ïa u ha khmat ka ïingbishar ha ka Lah Sngi U Blei hadien ba la kut ka por set phatok.
Ka kashari ka la bthah ruh ïa ki heh jong ka kynhun ED ban pynthikna ba ïa ki jingdonkam jong u ha ka liang ka koit ka khiah la pynbiang bad ban pynbeit ïa ki jingdonkam lada u jied ban peitngor ïa u Ramzan.
Nalor kata, la shah ïa u nongïasaid aiñ jong ka Faizy ban ïakynduh 15 minit bad u ha ka por ba u dang shah set patok.
Ka kynhun ED ha kaba sdang ka la pan por set 10 sngi, da kaba kynthoh ba u Faizy u donkam ban shah kylli jingkylli ha kaba ïadei bad ka jingkynnoh ba u la phah beaiñ ïa ka pisa, ka jingwad bniah ïa ka pisa, bad ki jingïadei ha ka kam pisa ha kaba ïadei bad kane ka mukotduma.
U Simon Benjamin bad u Naveen Kumar Matta, ki nongmudui ba kyrpang jong ka ED, ki la kynthoh ba u Faizy, u don ka jingïadei kaba la slem bha bad ka PFI, namar ba u la long u dkhot naduh ba la seng ïa ka, shwa ban seng ïa ka SDPI ha u snem 2009.
Ki heh jong ka ED ki la kem ïa u Faizy ha ka kad liengsuiñ jong ka Delhi katba u dang wan na Kochi.
Ka tnad ka kam ba ka SDPI ka la treikam kum ka kynhun saiñ pyrthei na ka bynta ka PFI bad ba ïa ka pisa kaba shongdor da ki klur la pynpoi lyngba ki lad ki lynti ki bym shym la pynpaw pyrthei.
Ki heh sorkar ki la ban jur ba ka jingtohkit ïa u Faizy ha ka jingshah set patok ka long kaba donkam ban ïakynduh ïa u da ki sakhi sabut bad lai tylli ki jingkren ba kongsan ha ka mukotduma.
Ka kynhun aiñ jong u Faizy, ba la ïalam da u Advocate Satyakam bad u Saipan Dastgir Shaikh, ki la pyrshah ïa ka jingkyrpad jong ka ED, da kaba kynthoh ba la dep ban kylli jingkylli ïa u la lai sngi bad ba baroh ki sabut pyrshah ïa u, ki dei ki kot ki sla.
“Lada kaba sah ka long tang ban buh jingthoh ïa ka jingkren jong u, kata lah ban leh wat ha ka jingshah set patok jong ka ïingbishar,” la pynskhem u nongïasaid aiï jong u.
Ka liang pyrshah ka la pynpaw shuh shuh ba ki jingpynkylla pisa ba la kynnoh ki la jia hapdeng u snem 2017 bad 2019, shwa ba yn khang ïa ka PFI ha u bnai Nailur jong u 2022, da kaba buh jingkylli kumno ïa ki jingpynïaid ïa ka pisa lah ban kheiñ kum ki jingmih na ka kam runar.
Ki nongïasaid aiñ ki la kyntait ruh ia ki jingkynnoh ba la ai pisa nabar ri, da kaba ong, “Ka SDPI kam don jingïadei ha ki kam pisa bad ka PFI, bad kam ju ïoh pisa nabar ri.”
Haba pyrshah ïa ki jingkynthoh, u nongmudui jong ka ED u Matta u la kynthoh ba u Faizy u la phet krad beit na ka jingshah kylli jingkylli wat la u la shah khot da kumba 12 sien.
